Stor deltaking i påskekampen: Her tek Amund årets første badetur

Den store påskekampen er over for denne gang, og ungdomslosane har no vore rundt på skulane og premiert vinnarane.

– Vi er nøgd med deltakarnivået, særleg med tanke på at det var kort påmeldingsfrist. Det offisielle talet var på 120 deltakarar, men vi trur kanskje det har vore fleire med på enkelte aktivitetar, men som ikkje har fått registrert seg, seier ungdomslosane Maria Solheim Thorsen og Sigurd Naterstad.

Den store påskekampen vart til etter engasjement frå ungdomslosane i Kvinnherad. Dei ynskte å leggja til rette for ein aktiv påske for kommunen sine ungdomar, til tross for koronapandemien.

På programmet var det 17 ulike aktivitetar som ungdomane kunne velja i. For å bevisa at dei hadde delteke måtte ungdomande knipsa eit bilete og senda til ungdomslosane på Snapchat.

Hoppa i elva

I kategorien «Årets første badetur» tok Simon Musland bilete då kameraten Amund Hella Berge-Soldal kasta seg ut i elva.

– Dette vart gjort før finvêret slo til, så all kred til den kreative badeløva, skriv ungdomslosane.

Dei er svært godt nøgd med at så mange ville bli med på påskejakta, som gjekk av stabelen frå 25. mars til 11. april.

– Vi hadde høg deltaking frå skulande. Rosendal ungdomsskule fortenar ekstra ros, då dei hadde svært høg deltaking. Ekstra gledeleg er det for oss når vi ser at ungdom, som kanskje elles ville vore innomhus, har vore sosiale og i aktivitet, skriv ungdomslosane.