Stolte over budsjettet: – Må ikkje løpa løpsk

Fleirtalspartia la ikkje skjul på at det er svært nøgde med budsjettet dei la fram og fekk vedteke i Kommunestyret.

Torsdag vart årets viktigaste møte gjennomført i Kommunestyret. Då vart budsjettet for neste år samt økonomiplanen for dei komande fire åra vedteke. Knut Johannes Helvik (H) fortalde at koalisjonen Høgre, Ap, KrF og Venstre hadde teke utgangspunkt i kommunedirektøren sitt forslag.

– Det har nokre klare retningsval som vi stiller oss bak. Samstundes trur eg vårt framlegg har ein endå betre sosial profil, sa han.

Forhandlingane mellom dei fire partia vart karakterisert som gode.

– Ingen har fått med alt, men alle har fått med noko, opplyste Helvik.

Budsjettet er på mange måtar relativt nøkternt.

– Vi er veldig privilegerte i forhold til dei aller fleste kommunar. Samstundes må vi heller ikkje løpa løpsk, understreka Knut Johannes Helvik.

Eigne avtrykk

Per Harald Havnen Löfgren Johansen (Ap) var heilt samd. Han svarte også på kritikken frå Frp og SV/MDG om kvifor ikkje alle parti var blitt inviterte til budsjettsamarbeid i år, slik som i fjor.

– Mykje av grunnen til at vi ikkje har gått inn i tettare forhandlingar med dei andre partia, er den situasjonen vi står i økonomisk. Det gjer at vi er nøydd å prioritera hardt, og erfaringsmessigt er det slik at med åtte-ni parti så er det vanskelegare å få eit nøkternt budsjett med eigne avtrykk, enn viss det er fire parti, analyserte han.

– Det er mykje meir som samlar oss i kommunestyret enn det som skil oss, kontra Ove Lemicka (Frp).

Skapte brudulje

Som presentert i Grenda førre veke, la både Frp og SV/MDG fram eigne budsjettforslag. Det same gjorde Senterpartiet i møtet på torsdag, medan INP skapte litt brudulje då dei annonserte at dei ynska å røysta mot alle forslaga, også kommunedirektøren si innstilling. Kommunen sin jurist vart då kalla inn, og han slo fast at det må vedtakast eit budsjett, og at det faktisk ikkje er lov å røysta mot alle forslag. Dersom det i teorien hadde vore eit fleirtal som var samde med INP, så kunne det ha vore straffbart.

– Kanskje vi kjem sterkare tilbake neste år, sa Heidi Bolette Jakobsen etterpå, og rekna med at INP då vil stilla med eige budsjett.

Ved røystinga falt etter tur forslaga til Frp, SV/MDG og Sp. Til slutt vart H/Ap/KrF/Venstre sitt sett opp mot kommunedirektøren. Dei fire representantane til SV og MDG gjekk for sistnemnde, medan resten følgde koalisjonen.