Stogg moglege vindmålingar

Me har nytta det siste halve året til å besøkja, og snakka med motstandsfolk i områder der det har føregått vindkraftutbygging, der det føregår, og der det er planlagd slike utbyggingar.

Det som kjenneteiknar desse sakene, er at det startar med vindmåling i ulike kommunar og til utpeikte område i desse. I seg sjølv høyrest dette svært uskuldig ut, men det er det ikkje. Det er berre starten til at kommunen og innbyggarane ikkje lenger kan ivareta sine demokratiske rettar til natur og kulturlandskap, og avgjerder gjort i politiske fora.

For aggressive utbyggjarar er nemleg ikkje eit nei frå aktuelle kommunar noko å bry seg om. Då ber dei berre om ein såkalla Statleg plan. Den overstyrer alt, og har vore flittig nytta – seinast i Tysvær kommune. Men det er berre eit men. Då må dei liksom ha kome i gang, og då kan løyve til vindmåling for å finne den mest optimale fjelltoppen vera starten. Difor gode politikarar i Kvinnherad kommune, og administrasjonen. Vær på vakt. Hald fast på vedtaket i kommunestyret frå hausten -19. Ikkje gje løyve, eller vetlefingeren. Dei tek ikkje berre heile handa – men heile «kommunen».

 

Aksjonsgruppa i «Nei til vindmøller i Kvinnherad»