Stjernekonsulent med tettpakka timeplan, store vyer og eige føretak

Då situasjonen var som den var, jobba ho heller den helga og følgde med på ei digital premieutdeling via pc-skjermen. Synneva la ut eit bilete av denne situasjonen på Facebook, og gratulasjonane frå vener, familie, kundar og kjenningar let ikkje vente på seg. Likeins emojiar på den positive sida av skalaen.

For dei som ikkje intuitivt forstår kva Perfect Home dreiar seg om, er dette eit firma som tilbyr homeparty med produkt innan design, interiør og velvære. Synneva har vore salskonsulent for Perfect Home i sju år.

Heilt tilfeldig

– Hadde nokon sagt til meg at eg skulle halda på med interiør for åtte år sidan, hadde eg berre ledd. Det er heilt tilfeldig at eg byrja med dette, men det er rett og slett utruleg kjekt å halda på med, smiler ho frå ein av godstolane i stova.

Synneva har to døtrer som ho alltid har vore åleine med. I tillegg har dei hatt hest, og det har alltid vore noko å henga fingrane i. Då døtrene vart større og dei ikkje lenger hadde hest å ta seg av var Synneva klar for å fylle dagane sine med noko meir.

Då ho kom over ei annonse av typen «kan dette vera noko for deg?», bestemte Synneva seg for å testa det ut.

– For min del handla det om å vera sosial og komma meg ut blant folk. Sjølv om enkelte forhandlarar no har byrja med nettparty, er ikkje dette noko eg kjem til å nytta meg så mykje av, seier ho, før ho legg til at ho sjølvsagt har nettparty om nokon helst vil ha det.

Fått vener for livet

Det sosiale ved å tilby homeparty vert ein raud tråd gjennom samtalen. For samstundes som ho møter veldig mange kjekke folk når ho held party, møtes også salskonsulentane i regionen for å utveksla erfaringar, bli kjend med nye produkt, vera sosiale og skape eit miljø.

Dessutan arrangerer Perfect Home to turar i året, kor Tallinturen som nyleg gjekk i vasken er blant desse. I desse ulike møtepunkta har Synneva fått vener for livet.

For å få med seg turane som vert arrangert må ein kvalifisera seg. Sidan Synneva byrja for sju år sidan, har ho kvalifisert seg til turane mest alle gongane.

– Ein må selja for minst 120.000 kroner og vera blant dei 70 beste i halvåret for å kvalifisera seg til turane. Det er to halvår eg ikkje har klart å kvalifisera meg. Det eine halvåret var då koronaen kom, og det andre halvåret hadde eg to hjarteoperasjonar, fortel ho.

Gratistur til Roma

Dei resterande halvåra har ho såleis vore på desse turane, kor opphaldet er dekka av Perfect Home.

Den første turen hennar gjekk til Roma.

– Sidan me hadde hest og eg var åleine med jentene, hadde eg mest ikkje reist før denne turen. Me reiste kanskje ein tur til Kristiansand om sommaren, men det var det liksom. Så for nokon som aldri hadde vore på ferie var jo ein gratistur til Roma heilt fantastisk. Før turen fann eg ut at det var ei vaksen dame frå Eikelandsosen som også skulle, så eg spurde ho om me skulle køyre i lag til Flesland. Ho er over 70 år, men vi er blitt så gode veninner! Eg er alltid innom henne når eg er forbi.

Fleire av dei ho møtte på denne reisa vert no omtala som vener, der i blant kvinna ho delte rom med i Roma.

– Der fekk eg ei veninne for livet altså! No er det alltid ho og eg som deler rom når vi er på desse turane, seier Synneva.

Mange jern i elden

Då Grenda er på tunet vert to brune Perfect Home-øskjer levert på døra. Dei er fulle av varer som skal køyrast ut til kundar i Kvinnherad, Ullensvang og Voss. Synneva likar seg heldigvis i bilen, og ho set dessutan pris på å ha det travelt.

I tillegg til å vera stjernekonsulent i Perfect Home, kor ettermiddagar og helger ofte går med til party og vareleveringar, jobbar ho som nattevakt på Rosendalstunet, er støttekontakt, gravsteinforhandlar og leiar i Kvinnherad skyttarlag. I tillegg kan ein fort møte på ho ute i den Kvinnherad sin flotte natur, ein stad ho trivs godt.

– Har du nokon gong tid fri?

– Det er stort sett føremiddagane, når folk flest er på arbeid. Og eg er flink å kvila når eg kan. Det er mange som synest det går i hundre og helvete her, men eg er jo åleine, og kan nytte all tida mi slik eg vil. Eg har alltid hatt mykje å gjera på, og eg likar å ha det travelt, slår ho nøgd fast.

Vil starte eige konsulentteam

Og for å toppe ein allereie innhaldsrik kvardag, vil Synneva no freiste å etablere eit eige team for den gamle Hordalandsregionen, utan om Bergen. Utrekningar viser at det er rom for 200 Perfect Home-konsulentar i dette området, men per i dag tel dei i underkant av 30. Desse 30 har ikkje sjans å dekke marknaden.

Synneva har stor tru på at det let seg gjera å etablere eit team med kjekke folk, og har dessutan alltid hatt lyst å starte for seg sjølv. I januar starta ho dermed sitt eige enkeltpersonforetak med dette i tankane.

– Eg har ikkje heilt våga å satsa for meg sjølv, og eg vil halda fram som nattevakt, det vil eg aldri slutta med. Og eg gjer det ikkje for å tena pengar heller, men eg ser for meg at dette kan vera kjekt å få til.

Namnet er allereie klart: Team Vestavind.

Synneva understrekar at ein ikkje treng å ha party kvar kveld, og at det å vera salskonsulent for Perfect Home fint kan kombinerast med både familieliv og dagtidjobb.

– Dei som lurer på om dette kan vera noko å testa ut kan ta kontakt med meg. Eg vil følgja opp og gi opplæring.

– Om det er marknad for 200 salskonsulentar i området her, er du ute etter å ha eit så stort team?

– Dersom det går, vil eg gjerne ha 200, sluttar ho med eit smil.