Stinn brakke på Omvikdalen skule
Alle elevane ved Omvikdalen skule har vore i sving for å arrangera kafé til inntekt for TV-aksjonen. Det var svært populært blant familiar og bygdefolk, og det vart samla inn over 20 000 kroner.
– Me har perla armband som vert selt. Og så skal me dansa blime-dansen, fortel tre jenter som sit på scenekanten i gymsalen og slår av ein prat med Grenda.
Me har tatt turen oppom Omvikdalen skule og kaféen dei har stelt i stand til inntekt for TV-aksjonen. Der står kake-køen til langt utanfor gymsalen.
Annonse
– I samanheng med TV-aksjonen, hadde me lyst til å gjera noko, heile skulen ilag, seier ein smilande rektor Heidi Hatteberg.
Sjette klasse har baka kaker og bollar i mat og helse-timane. 5. og 7. klasse står i kaféen og sel bakevarer og drikke. Alle klassesteg har perla armband, som óg er til sals. Brosjyrar har blitt laga, og lagt i postkasser i heile Omvikdalen, og skal sei bygdefolket har teke til seg invitasjonen. Det er rett og slett stinn brakke på skulen i dag.
Bollar og «Blime»
– Det er veldig kjekt at det kom så mange. No har me sett opp alle borda me har, og det er jo fullt, men det ordnar seg nok, ler Hatteberg.
Annonse
Jentene på scenekanten har hatt to timar skule i dag, før kaféen opna. Dei synest det er ein kjekk dag.
– Bestemor og pappen min er på besøk, seier Sanna.
– Det var kjekt å få ein pause frå skule, meiner Sunniva.
– Eg har ete ein bolle, og så held eg på med eit glas saft, fortel Maja.
Det er tydeleg at elevane har blitt godt oppdatert på kva som er målet for TV-aksjonen.
– Pengane skal gå til at familiane til ungar som er sjuke kan bu litt nærmare sjukehuset, fortel dei omtrent i kor.
Annonse
Kakesalet og armbandsalet går strykande, og første- og andreklassingane viser fram Blime-dansen til stor applaus. Det vart ein skikkeleg triveleg kafédag på Omvikdalen skule.
