Stilte spørsmål på Stortinget om Fjelbergruta
Liv Kari Eskeland (H) har på Stortinget fremja spørsmål om ei problemstilling som ho meiner utfordrar regulariteten til ferjene til og frå Fjelberg.
Publisert
Den tidlegare Stord-ordføraren og noverande stortingsrepresentanten Liv Kari Eskeland har sendt inn spørsmål til samferdsleministeren. Der heiter det: «Det er ei generell utfordring å få mannskap til drift av fylkesvegferjene. Ordninga med beredskapssamband har ytterlegare forverra situasjonen for enkelte samband, spesielt også fordi Sjøfartsdirektoratet har inndrege dispensasjonar på kviletid. Spørsmålet om kven som skal ta kostnadane for desse beredskapsturane er løfta til departementet frå Statsforvaltaren».
Sjølve spørsmålet gjeld kva tid ein vil få ei avklaring knytt til ansvaret for helseberedskapen på ferjesambanda. Ingen konkrete ferjestrekningar er nemnde i spørsmålet, men i ein e-post til media opplyser Liv Kari Eskeland at ho spesielt tenkjer på Fjelbergruta.
Annonse
Kviletid
I ei grunngjeving til spørsmålet står det at Vestland fylkeskommune har ansvar for seks ferjesamband som har tilleggsfunksjon som beredskap for transport av akuttmedisinske tilfelle utanom ordinære opningstider.
«Ved godkjenning av skiftplanar har Sjøfartsdirektoratet no presisert at det ikkje lenger vert gjeve unnatak frå regel om 6 timar samanhengande kvile ved beredskapsturar. Det betyr i praksis at dersom kviletida vert avbroten eller redusert som følgje av ein beredskapstur, skal mannskapet ha minst seks timar samanhengande kviletid direkte etter beredskapstur», skriv Eskeland.
Konsekvensane av vilkåret er at dersom fartøyet får ein beredskapstur om natta, må morgonavgangar innstillast. Ifølgje Eskeland har det kome sterke reaksjonar frå Helse Bergen.
Annonse
På Stortinget si nettside står det at svar på spørsmålet enno ikkje ligg føre.
