Stilte seg opp ved ungdomsskulen og predikerte

Levi Jensen er ein predikant frå Sandefjord som mange av tenåringane i Kvinnherad kjenner til, blant anna gjennom det sosiale mediet TikTok. Fredag var han i Rosendal, etter det Grenda får referert invitert av elevar ved ungdomsskulen til å koma og predikera.

Han stilte seg opp med barnevogn, kors og høgtalar ved vegen mellom skulen og busshaldeplassen, vegen som 80 til 90 prosent av skuleelevane brukar for å koma seg enten til bussen eller til gangvegen heim.

Jensen er kontroversiell, sjølv om han har klart å gjera seg populær blant anna hos tenåringar, og då spesielt blant gutar. Han har støtta konverteringsterapi av homofile (Tvedestrandsposten), og er ein tydeleg konspirasjonsteoretikar og vaksinemotstandar (Jærbladet).

– Ikkje begeistra

Leiinga ved Rosendal ungdomsskule var ikkje spesielt nøgde med scenane som utspann seg mellom skulen og busshaldeplassen.

– Me er ikkje begeistra for dette stuntet. Det er først og fremst på grunn av frykt for trafikkfarlege situasjonar, då me vart fortalte at Jensen skulle stilla seg opp ved busshaldeplassen, fortel avdelingsleiar ved Rosendal ungdomsskule Rune Melheim.

– Eit anna aspekt er at alle som står rundt predikanten blir filma og lagt ut på ulike sosiale media, noko Jensen og våpendragaren han har med seg gjer etter slike stunt. Det skjer utan noko form for godkjenning frå nokon si side, kommenterer Melheim vidare.

Jensen har gjort det til ein vane å stilla seg opp ved skular, noko som har ført til hyppige avisskriverier. I januar 2022 meldte Bergensavisen (ekstern lenke) at ein skule i Bergen hadde varsla politiet om ønska besøk av Jensen.

– Det er heilt uakseptabelt at han legg ut film og bilde av elevar på nettet, utan samtykke frå foreldra eller skulen, kommenterte rektor ved skulen til ba.no då.

Rektor Bjørn Olav Tveit skreiv melding heim til dei føresette til ungdomsskuleelevane før Jensen stilte seg opp ved Rosendal ungdomsskule.

– Det er fleire ting som er problematisk med denne turneen [til Jensen]. Skulen har sjølvsagt ingenting å gjere med kva talarar eller predikantar elevane våre vel å lytte til, og vi har stor respekt for både ytrings- og religionsfridom. Det er likevel slik at bodskapen til denne predikanten verkar å vere svært intolerant og trongsynt. I tillegg verkar det som om det er ein slags nasjonal mobbekampanje blant ungdomar, der mykje av motivasjonen til ungdomane er å gjere narr og håne mannen. Heile greia framstår kort sagt som ein tap-tap-situasjon for alle partar, skreiv mellom anna Tveit i meldinga.

Velsigna sykkel

Jensen heldt ein flammande preik for Rosendal-elevane då dei passerte, delte ut på biblar og velsigna til og med syklar på oppmoding og med tungetale.

Pressa var han ikkje interessert i å snakka med.

I skrivande stund er det ikkje publisert video frå seansen i Rosendal på Youtube. Om det finst noko av det på TikTok, er underteikna for gamal til å få med seg. Dessverre eller heldigvis, alt etter korleis ein ser det.