-  Sterkt motivert for Stortinget

Sjansen er stor for at Kvinnherad får ny ordførar neste haust. Hans Inge Myrvold er nemleg nesten sikra fast plass på Stortinget.

 

Laurdag heldt Hordaland Senterparti sitt nominasjonsmøte føre stortingsvalet i september 2021. Forsamlinga følgde innstillinga til nominasjonskomiteen, og sette Hans Inge Myrvold frå Hatlestrand på tredjeplass. Slik målingane for Sp er no, betyr det nesten garantert fast plass på Stortinget.

- Audmjuk og stolt over å få samrøystes tilslutning frå alle dei gode lokallaga. Eg er veldig klar og sterk motivert for å løfta viktig politikk og saker for og med heile Hordaland, skriv Myrvold på Facebook etter røystinga.

Ein konsekvens av nominasjonen, er at Kvinnherad kommune truleg vil få ny ordførar frå september. Hilde Enstad (Ap) kan nok allereie førebu seg på å ta steget opp frå vervet som varaordførar.

Kjersti Toppe frå Bergen har fyrsteplassen på lista, føre Nils T. Bjørke frå Voss. Det er elles verdt å merka seg at Marianne Nordhus frå Fjelbergøy står på 19. plass.