Sterke skuldingar i Frp

Sjølv om nominasjonsmøtet gjekk ganske fint for seg, tyder reaksjonane etterpå at frontane i Frp er temmeleg steile.

Bråket som kom opp i dagen under nominasjonsprosessen, er ikkje av heilt ny dato. Det stadfesta også Ove Lemicka då han las opp kommunestyregruppa si årsmelding.

– Det oppstod ein konflikt i haust mellom fleirtalet i styret og kommunestyregruppa. Det har vore manglande tillit begge vegar, noko som har ført til dårleg framdrift i einskilde saker, sa han.

Så vidt Grenda forstår skal usemje om gratis SFO vera den viktigaste årsaka til splittinga. Ellinor Rein var tydeleg i eit kommunestyremøte at ho var imot at dette tilbodet skulle vera gratis. På neste møte var ikkje Rein til stades, og då gjekk alle Frp sine tre representantar inn for gratis SFO. Dette skal styret ha reagert sterkt på.

At Ellinor Rein trekte sitt kandidatur til å bli Frp sin ordførarkandidat og at Ove Lemicka vart valt i staden, førte til sterke reaksjonar frå Rein sine støttespelarar.

– Eg har blitt kalla både dysfunksjonell og løpegut for andre, sa Kai Morten Torget, leiar i nominasjonsnemnda, på møtet.

Personkonflikt

Han fortalde at motparten mellom anna hevdar at Ellinor Rein har nekta å distribuera einskilde e-postar, men ifølgje Torget skal dette dreia seg om mailar ho ikkje har vore forplikta til å senda vidare.

– Det er openbert at det her ligg ein personkonflikt og murrar, og det er openbert at nokon ikkje har respekt for den øvste leiaren, og det er ikkje greitt, sa Torget vidare.

Han hevda også at motparten hadde brote både dei etiske og dei organisatoriske retningslinjene til partiet.

– Det seier litt når så mange stiller på eit møte der det normalt ville vore 20, sa han.

Etter møtet kom Torget med ein kommentar til media.

– Vi føreslo ei liste med god geografisk spreiing, vi løfta opp damene og vi fann ordførarkandidaten vi meinte er best til valet. Til slutt enda det med ei liste der kvinnene trekte seg grunna dårleg behandling og manglande respekt. Dermed fekk vi ei liste med høg snittalder, medan konkurrerande parti har unge kandidatar og «up-and-coming» kvinner. Underteikna vil ikkje assosierast med den slags og har difor meldt seg ut, heiter det der.

Drittpakke utan sidestykke

Heller ikkje Ellinor Rein la fingrane mellom.

– Det har vore ein drittpakke utan sidestykke, og det er grenser for kor mykje ein skal tola som politikar. Det har ikkje vore kjekt, men det har hjelpt at eg har fått mange støtteerklæringar frå andre politikarar, sa ho.

Også ein annan medlem i nominasjonsnemnda har no meldt seg ut, Eskil Moen. Han går knallhardt i strupen på Ove Lemicka.

– Dagens store vinnar er middelaldrande menn som er redd for å mista innflyting og makt. Dagens store tapar er lokaldemokratiet, som mistar fleire dyktige folkevalde, på grunn av ein skitten prosess som har vore prega av bakvaskingar og brot på partiet sine vedtekter. Eg ynskjer Vestland Frp lukke til med Ove Lemicka. Det einaste positive her er at no er Ove deira problem, og heldigvis ikkje lenger mitt. Etter 16 års medlemskap er det no slutt for min del, då eg ikkje vil bli assosiert med noko som helst som har med Ove Lemicka å gjera, melder han.

Samla troppane

Ove Lemicka slår på si side fast at det i eit demokratisk parti er veldig fint at det er medlemmene som bestemmer kven som skal vera ordførarkandidat.

– No er beslutninga tatt, og eg er glad for at eg har fått tillit til å vera Kvinnherad Frp sin kandidat, og no kan partiet gå vidare, sa han etter møtet.

– Men er det mykje til tillit når du vinn med éi røyst og resten er blanke?

– Eg meiner eit fleirtal er eit fleirtal. Eg veit også at det er fleire som ville ha røysta på meg, men som ikkje kunne vera her i dag. Fleire har dessutan meldt seg inn i det siste, utan å ha stemmerett i dag. No skal vi gjera det vi kan for å samla troppane og sjå framover. Men ein ser jo på møtet at nokon har vunne og andre tapt, slik er det berre, filosoferte han.

Når det gjeld dei sterke skuldingane frå Torget, Rein og Moen, føretrekk Lemicka å vera kortfatta.

– Desse folka har no forlate partiet, slik eg forstår det. Vi må difor sjå framover, og gjera eit godt arbeid slik at veljarane får tillit til oss igjen, seier han.