Sterkare saman
For fyrste gong speler Rosendal Skulekorps og Uskedalen Skulemusikk julekonsert ilag. Grenda sin journalist er «blåst av banen» over kor flott klang det vart med eit stort felleskorps.
– Dette skal bli ein god start på førjulstida, lovar Marianne Korsvold idet ho ynskjer publikum velkomen til julekonsert i Uskedalen fredag kveld.
Og det vert det. Dei to korpsa har øvd ilag sidan sommaren, og fått til eit flott samspel. Repertoaret på julekonserten vekslar mellom festlege og rolege songar. Det er mange kjende og kjære julesongar, men publikum får også presentert meir ukjende stykke i gode arrangement.
Annonse
Godt samspel
Nick Hughes leiar korpset med stor tryggleik, og musikarane er flinke til å følgja med på dirigenten sin. Dersom nokon dett litt ut av takta, går det veldig fort å samla alle saman igjen, så underteikna er svært imponert. Eitt døme på musikk som slett ikkje er lett å spela, er «Carol of the bells». Jammen fiksar dei to korpsa å spela denne også!
I midten av programmet får publikum nokre solonummer. Det er med på å gje ein variert og kjekk konsert.
Men kvifor har dei to skulekorpsa slått seg saman? Me slår av ein prat med Malin Haavik Tungesvik frå styret i Uskedalen Skulemusikk og Arnout Ijzermans i Rosendal Skulekorps sitt styre.
Annonse
– Me har ikkje slått oss saman, me er framleis to ulike korps. Men me samarbeider fordi det har minka litt på medlemmane. Det starta med at me spelte ilag på Hordablæsten i vår. Det var veldig kjekt, og ungane fann kvarandre veldig fint, fortel Malin Haavik Tungesvik.
– Me reiste jo òg ilag til Mikkelparken og hadde seminar i tre dagar. Då hadde me både øving og fritid ilag. Det er veldig kjekt at ungane møtest over bygdegrensene og skapar nye relasjonar. Og me treng framleis fleire folk, oppfordrar Arnout Ijzermans.
Meir musikk, meir glede!
Tuva Lund (13) speler i Rosendal Skulekorps, og ho likte å øva ilag med Uskedalen Skulemusikk fram mot julekonserten.
– Det har vore veldig kjekt. Ein del av julesongane sit inne, fordi me har spelt dei før, men det har også vore nokon nye. Eg sit lengst bak i korpset, og speler basstrombone, fortel ho.
– Ta bilete av oss då!, kjem det frå to glade korpsmusikantar, som passar på å få i seg nok kjeks etter konserten.
Annonse
Dirigent Nick Hughes er godt nøgd med kvelden, og synest det lovar bra til konserten dei skal ha dagen etter i Rosendal.
– Det er kjekt å spela litt ilag. No har me nesten full besetning, me skulle kanskje hatt eit par tubaistar. Me har fått inn to-tre aspirantar kvart år dei siste åra, og det er veldig bra. Me vil at det skal koma endå fleire òg, seier dirigenten.
Det er i alle fall tydeleg for Grenda-journalisten at dette er ein inkluderande og kjekk aktivitet som samlar både ungar og foreldre. Som Arnout Ijzermans seier det:
– Fleire ungar, meir musikk, meir glede!
Vel blåst!
