Stengjer stien frå Bondhusvatnet og innover
På grunn av helikoptertrafikk og vegarbeid, blir stien langs Bondhusvatnet stengt frå laurdag av.
«Det er framleis råd å gå opp til vatnet, men derfrå blir det stengt», fortel Astrid Bakke Haavik.
Stien har behov for opprusting etter årevis med slitasje. Nasjonalparkstyret har difor starta eit prosjekt med sti-restaurering, og no er fire sherpaer og ein arbeidsleiar frå Stibyggjaren AS i gong med arbeidet. For å gjera stien mest mogleg robust vil det bli nytta stein frå nærområdet til å styrka stien. All stein som ikkje kan berast for hand vert samla i sekkar og frakta med helikopter.
Annonse
Dette vil føra til mykje fyking i sørenden av vatnet på laurdag. Av omsyn til tryggleiken for turfolk og arbeidslaget, vil stien vera stengt innover frå nordenden av Bondhusvatnet heile laurdagen.
«Det var nær sagt umogleg å få tak i helikopter til arbeidet på kort varsel, og den einaste ledige dagen var dessverre laurdag», forklarar leiar i Stibyggjaren AS Geir Vetti.
Arbeidslaget arbeidar fram til slutten av september, før dei reiser heim att til Nepal. Det vert stenging av stien nokre dagar neste veke også, så dei får fred til å jobbe på dei ekstra vanskelege partia.
«Me håpar folk vil ha tålmod og gle seg over at stien vil verta framkomeleg for folk og fe i mange år framover», skriv Astrid Bakke Haavik.
