Stemningsfull julekonsert

Etter snart tre år kunne endeleg Strupebandet invitera til julekonsert igjen, og det var det mange som ville ha med seg. Denne gongen la dei opp til heile tre konsertar, alle i Halsnøy Kulturhus, der dei to første konsertane var utselte, noko som ikkje er overraskande. Folk kjem langvegs i frå for å få med seg storhendinga, og Strupene vert berre betre og betre for kvart år. Dei heldige som fekk tak i billettar vart neppe skuffa.

Fredag opna Strupebandet kvelden med songen «En stjerne skinner i natt», med Frøydis Sjo som solist, føre ein fullsett sal med smilande og nynnande tilhøyrar. Til stor gleda for både Strupene og folket vart dei styrt med ei stødig hand av dirigent Kari Aalvik Tarberg. Også barnekoret Perlene var med, både på opningssongen og fleire andre nummer utover kvelden.

Dyktige solistar

Både konferansier Eli Hårklau, bandet, strupene, solistane og Perlene leverte til terningkast seks den neste timen. Fleire tradisjonelle julesongar vart servert, som «Det lyser i stille grender» og «Halleluja», og litt meir ålment ukjente variantar som «Pie Jesu», framført av Kristin Isdal og tidlegare dirigent Hilde Svalbjørg. Spesielt sjarmerte Perlene med eigne nummer som songane «Julehjerte» og «Snart jul», der kordirigenten Maria J. Hansen var solist på sistnemnte.

Strupebandet er kjent for sine dyktige solistar, og denne kvelden var det både kjende og nye stemmer. Til dømes fekk Camilla Øvstebø og Knut Grønseth fram både smil og tårer då dei song «Stjernesludd» av Kurt Nilsen. Rørande og flott vart det då Camilla Øvstebø framførte balladen «Home to you» av Steve Mac og Sigrid (Solbakk Raabe), med Rune Eikemo på piano.

Vrikka på dansefoten

Ikkje lenge etter byta Rune Eikemo pianoet ut med mikrofonen, og framførte gospelsongen «This little light of mine» saman med Kristin Isdal. Dette nummeret fekk verkeleg opp stemninga i salen, og det var umogleg å ikkje vrikka på dansefoten.

Og julestemning skulle det verkeleg bli meir av. Då konserten nærma seg slutt framførte strupene songen «O helga natt» med Torgeir Rusten som solist, og avslutningsnummeret «Deilig er jorden» der både Perlene og publikum var med.

I bandet sat dei faste musikarane, Hallgeir Tvedten og Roy Særsten. Med som gjestemusikarar var Ingrid Sæverud Røen på flygelhorn og eufonium, og Olav Eger Hesjedal på klokkespel og perkusjon.. Og som fleire gonger tidlegare, var Remi Sjo med på slagverk. I tillegg er Torvald Gjerde, som var den fyrste dirigenten til koret, attende i Strupebandet. Musikalsk som han er, spelte han også piano då songen «O helga natt» vart framført.