– Stemninga har aldri vore betre
Festidalen er like om hjørna, og tradisjonen tru er han også i år spekka med både store og spanande namn. Grenda tok ein prat med Øystein Greni frå Big Bang for å høyra litt om kva me kan forventa på eit av høgdepunkta i Uskedalen denne sommaren.
Den nye plata som Big Bang akkurat har sloppe, Le Californie, blir ein sjølvsagt del av bagasjen, og Greni kan fortelje om svært god respons.
– Me har fått dødsbra respons på den nye plata, noko som er kjempemoro. Me hadde ein bra sleppfest, og har fått øvd litt i forbindelse der, fortel ein strålande nøgd Greni på telefon.
Annonse
Gode vibber
På spørsmål om dei har hatt ein bevisst raud tråd gjennom plata, er han heilt klar på at å planlegga slike ting ikkje er noko dei driv med. Han lar heller kjenslene styra, og vel å fylgja dei for å koma fram til dit som både han og bandet ynskjer å vera.
– Alle kunstverk, anten det er plater eller noko anna, så er det jo eit slags bilete på korleis det mennesket eller dei menneska har hatt det i ein periode. Ein slags dokumentasjon på stemninga akkurat då. Så me lagar noko me sjølve tykkjer er dritbra, det skal sjølvsagt henga saman med visjonen til bandet, men det er i grunn noko som berre går av seg sjølv. Me treng ikkje å planlegga det noko særleg, utdjupar han.
– Sommarturnéen er så vidt i gong og Festidalen er eit av dei fyrste punkta på programmet. Korleis er stemninga i bandet no?
Annonse
– No vil eg sei at stemninga aldri har vore betre. Det var jævlig gøy sist, no er det 11 år sidan så då er det faen meg på tide å koma tilbake, seier han entusiastisk.
På spørsmål om han hugsar konserten han gjorde under Festidalen tilbake i 2012, etterlet han liten tvil.
– Å ja, det hugsar eg godt! Eg fekk nokre solbriller, som eg sjølvsagt har mista, men mest så hugsar eg den utruleg gode vibben som var der. I tillegg var det innmari fint der, veldig fin natur. Så no må me berre sørga for å levera endå betre denne gongen, men på 11 år så har det jo blitt nokre timar med tromming og speling, så me bør jo ha lært noko, svarar Greni.
– Kva kan me forventa av dykk denne gongen?
– Livesettet vårt er noko me finpussar på for kvar konsert, me varierer låtane og likar å fylgje veldig med på publikum for å prøva å skreddarsy til kvar konsert. Nokre publikum er rolegare, andre er det meir trøkk i. På det viset får me best mogeleg stemning, seier den erfarne vokalisten.
Rop ut
Annonse
– Så det er lov til å ropa etter låtar eller ta med plakatar. Om nokon har sterke ynskje må dei gjerne gje ein lyd på det, kanskje dei kan skrive dei i kommentarfeltet, så ser me, oppfordrar han.
Då Grenda fortel at det same helga også skal vera pride-parade i bygda for fyrste gong blir han både gira og glad.
– Eg er stor fan av pride og har mange familiemedlemar som er i lhbtiq-miljøet, i tillegg har eg vakse opp med vener av foreldra mine som har vore det. Det er veldig bra at Norge byrjar å slappa litt meir av, det er faen meg på tide, avsluttar han opprømt.
