Statsforvaltaren opphevar reguleringsplanen for Børnes

Arbeidet med å få på plass ein ny reguleringsplan for Børnes Industriområde har pågått i fleire år, med mål om å erstatta den gamle reguleringsplanen for området, 2 som ikkje held dagens krav til moderne næringsareal. Ønsket er å leggja til rette for eit framtidig og maritimt retta næringsareal, og planområdet er om lag 234 daa, inkludert areal i sjø.

I brev til Kvinnherad kommune informerer Statsforvaltaren at dei opphevar den vedtatte reguleringsplanen, og gir klagarane medhald.

«Avgrensa høyring»

Planen vart vedtatt 27. oktober 2022, og vart kunngjort 29. november same år, med klagefrist på tre veker. Innan fristen kom det klage frå Brødrene Hjønnevåg, som held til på Børneset, og frå naboar til industriområdet.

– Det ligg føre to klager på reguleringsplanen, som kommunen har handsama kvar for seg. Statsforvaltaren ser klagene i samanheng og handsamar dei samla. Me oppfattar at klagarane har felles interesse i å motsette seg reguleringsplanen i noverande form. Begge klagarane har også kravd nytt offentleg ettersyn, og til dels vist til dei same momenta som støtte for dette, skriv Statsforvaltaren i samband med deira vurdering av klagane.

Slik dei les dokumenta, var utkastet til planføresegner per 17.11.2020 ein revisjon basert på innspel frå dialogen, der høyringsinstansen «…etter grundig gjennomgang av tema støy og forureining i reviderte føresegner…» (Statsforvaltaren si utheving), også var positiv til justerte plandokument.

Statsforvaltaren kjem derfor til at kommunen, som eit minimum, skulle ha lagt dei siste endringane fram for sektorstyresmaktene og andre direkte råka gjennom ei ‘avgrensa høyring’.

– Me viser då til at offentlege organ ikkje berre har plikt, men også ein lovfesta rett, til delta i planlegginga innanfor sitt saksfelt, jf. pbl. § 3-2. Det er kommunen som skal leggja til rette for slik involvering og medverknad, jf. pbl. § 5-1, på same måte som andre planforlagsstillarar, skriv Statsforvaltaren i brevet til Kvinnherad kommune.

Klagene før fram

Det blir vidare vist til at reglane i plan- og bygningslova §§ 12-8 til 12-10 må også reknast som minstekrav til ein slik prosess, og vert supplert av forvaltningslova sine krav til saksopplysing og informasjon, jf. pbl. § 1-9, jf. fvl. § 17 mfl.

– Me kjem altså til at detaljreguleringsplanen ikkje kunne vedtakast i møtet 27.10.2022, utan ytterlegare høyring eller medverknad. Planutkastet var endra på fleire, til dels vesentlege punkt, sjølv om hovudtrekka i arealbruken var den same. Endringane var kontroversielle, og kan saka kan ikkje seiast å ha vore forsvarleg opplyst før vedtak, konkluderer Statsforvaltaren, og slår fast at klagene har derfor ført fram, og at dei har oppheva planvedtaket som ugyldig.

– Vedtaket på side 1 i dette brevet er endeleg og kan ikkje klagast vidare, jf. forvaltningslova § 28 tredje avsnitt. Følgjene av opphevinga er at kommunen lyt handsama planframlegget på nytt. Dersom kommunen går vidare med planen, slik han ligg føre, vil me rå til at endringane frå den politiske styringsgruppa, vert sende på avgrensa høyring som nemnt, om ikkje kommunen i staden finn det meir føremålstenleg med eit alminneleg, offentleg ettersyn. Me presiserer elles at det er kommunen sjølv som tek stilling til den vidare handsaminga, sluttar Statsforvaltaren i brevet.

Dermed vil arbeidet med sluttføringa av ny reguleringsplan for Børnes Industriområde bli ei sak for eit tredje kommunestyre. Oppstarten av detaljreguleringa for industriområdet vart varsla 27. juni 2019.