Statsbudsjettet: Bøndene nøgde med ekstra milliard til landbruket

Den nye regjeringa med mat- og landbruksminister Sandra Borch i spissen kjem bøndene i møte på ein måte som Solberg-regjeringa ikkje var villig til å gjera.

– Me var i Oslo då tilleggsforhandlingane vart godkjente, og ministeren kom til oss. Før har me måtta halda hardt på krava våre, men Borch var klar på at no skulle det gjevast til bøndene. No kan det bli ei ny tid, og dette er ei retningsendring, meiner Kjersti Hjelmeland.

Ho er styremedlem i Vestland Bondelag, og var blant dei som stod på barrikadane for bøndene i forkant av landbruksoppgjeret i vår.

Investeringstilskot

Hjelmeland opplevde bondeopprøret i vår talte for døve øyrer, men den nye regjeringa har i løpet av to korte veker funne 754 millionar til å utjamna prisauke på blant anna kunstgjødsel, byggevarer og kraftfôr.

– Me tener ikkje noko på det, men me mister ikkje kjøpekraft i forhold til andre. Det trengs mykje pengar inn i næringa, og dette er berre ei byrjing. Ein må auka inntektene til bøndene på sikt også, seier Hjelmeland bestemt.

I tillegg doblar Borch& co. investeringstilskotet med 200 millionar kroner. Innan 2034 skal alle mjølkebønder over på lausdriftsfjøs, og fram til no har bøndene som vil byggja om til slik drift kunna søkja om tilskot frå ein pott på 200 millionar kroner. Den potten har til no blitt brukt opp tidleg på året.

– At investeringsramma aukar, kjem vel med. Det er 751 bosflorar igjen i Vestland, så det er mange som skal gå over til lausdrift, og dermed veldig mange som kjem til å søkja om tilskot. Me er kjempenøgde med dette, det er endå eit steg i rett retning for bøndene, vurderer Omvikdal-bonden.

Inviterte politikarane på gardsbesøk – fekk sjå kvardagen for vestlandsbonden

Auka inntekter

Men om regjeringa viser at dei ser bøndene og deira behov, så har likevel bondelaget ingen planar om å sitja med hendene i fanget vidare framover.

– Det viktigaste no blir å auka inntektene på varene me leverer. Kjedene går på import av kjøt, og mange er seg sjølv og si eiga lommebok nærast. Ein kan ikkje berre skru opp prisane på dei norske varene, for då vel kundane dei utanlandske varene. Dette er noko som må gjerast gradvis, analyserer Hjelmeland.

Ho ser definitivt lysare på livet som vestlandsbonde med Sandra Borch i ministerstolen.

– Ho sa til oss at «Fram mot jordbruksforhandlingane skal me visa dykk kva me står for», så me er spente. Eg syns at den førre regjeringa viste altfor godt kva dei syns om det norske landbruket, når me såg kva KrF gjorde med sin landbruksminister i to år, kontra kva Senterpartiet fekk til på to veker, sluttar Hjelmeland.