Startar tilbod for rask psykisk helsehjelp

Rask psykisk helsehjelp (RHP) er eit nytt tilbod i Kvinnherad kommune, sjølv om ein har hatt delar av tilbodet før. No har kommunen sett saman eit lite team, beståande av Birte Thoresen og Eva Handeland Sjo, som skal jobba med dette framover. I tillegg er det tilknytt psykolog til teamet.

Samhandlingsreform

– Dette er noko me har jobba med sidan 2020, då ein fekk grønt lys frå formannskapet om at ein skulle oppretta tilbodet, fortel Linn Stene Hellås, som er einingsleiar for rus og psykiske helsetenester.

Thoresen og Handeland Sjo har begge tatt vidareutdanning i kognitiv terapi for å kunna gå inn i teamet som skal yta rask psykisk helsehjelp. Begge er sjukepleiarar med spesialisering innan høvesvis psykiatri og psykisk helse.

Begge var ferdige med dei siste eksamenane i desember, og er no i gang i jobbane sine.

– Bakgrunnen for å at ein har oppretta eit RHP-team, er at kommunane skulle overta behandlingsansvaret for lettare psykiske lidingar, som ein del av samhandlingsreforma. Me såg også ein auka pågang i denne gruppa, både gjennom fleire tilvisingar frå fastlegane, men også frå direkte kontakt frå dei som ynskjer hjelp, forklarer Stene Hellås.

Dette har dei merka særleg etter pandemien var over.

Direkte kontakt

Tilbodet med rask psykisk helsehjelp er ein del av satsinga til kommunen på tidleg innsats og førebyggande arbeid.

– Ein ynskjer å koma tidleg inn og tilby hjelp når ein treng det, til rett tid, seier Thorsen og Handeland Sjo.

Teamet ynskjer at ein tar kontakt rett til dei, alternativt kan ein kan gå gjennom fastlegen.

– Om nokon ringer oss, så er målet at me skal oppretta kontakt same dag eller neste arbeidsdag, der me tar ein kartleggingssamtale. Så blir me einige om kva som er det rette for den personen, forklarer Thoresen.

Poenget er at ein skal kunna koma i gang raskt, og finna kva som er rette behandlingsmodellen for dei.

– Kven er det som kan nytta seg av RHP?

– Det er eit tilbod for dei med angst og fobiar, milde og moderate depresjonar, rusvanskar og/eller søvnvanskar, grovt sagt dei med lettare psykiske vanskar kan ta kontakt. Det krev litt eigeninnsats å få hjelp, forklarer Handeland Sjo og Thorsen.

Rask psykisk helsehjelp er basert på kognitiv åtferdsterapi.

– For å ha best mogeleg utbytte av tilbodet, er det viktig med eigeninnsats og at ein har kapasitet til å arbeida med verktøya i kvardagen, men dei får rettleiing undervegs. Dette betyr i praksis å ta i bruk ulike skjema og teknikkar over tid for å bli meir bevisst på samanhengen mellom kropp, kjensler, handlingar og tankar, utdjupar teamet.

Oppfølginga blir tilpassa individuelt, og har ein trappetrinnsmodell med undervisningsbaserte kurs, som kurs i meistring av depresjon (KID), kurs i meistring av belastningar (KIB), recoverykurs og nettbasert sjølvhjelpskurs med rettleiing, behandlingsgrupper og individuell psykoterapi.

– Målet med tenesta er å gje behandling og hjelp tidleg, for å førebygga sjukdomsutvikling. Det er lett tilgjengeleg og gratis, seier dei om tilbodet for personar over 18 år.

Rettleiarar

Duoen i teamet omtalar seg sjølve som rettleiarar.

– Dei som tar kontakt må jobba med å problema, jamt og trutt, noko som har stor effekt. Mange seier det er ein nyttig og fin måte å få hjelp og jobba på, refererer dei.

– Det er ofte ein terskel å be om hjelp, difor er det også viktig at me kan tilby hjelp når dei ber om det. Dei som kjem har innsett at dei treng hjelp, og er ofte motiverte for å gjera noko med det, påpeikar Stene Hellås.

Dei skal også losa dei som tar kontakt vidare i systemet om det viser seg at dei treng meir hjelp enn det RHP tilbyr.

– Det er veldig kjekt å jobba med, og me ser rask betring og får mykje positiv tilbakemelding på denne måten å jobba på. Ein ser at symptomtrykken avtar, og ein får hjelp til sjølvhjelp, reklamerer teamet.

Treng du kontakt med RHP-teamet, er det enklaste å senda ein e-post til raskpsykiskhelsehjelp@kvinnherad.kommune.no, og legga igjen namn, telefonnummer og ein invitasjon til teamet om å ta kontakt.

– Då skal me gjera det snarast råd, sluttar Birte Thoresen og Eva Handeland Sjo.