Startar planarbeid for setjefisk i Sunndal

Oppstarten er kunngjort mellom anna på heimesida til Kvinnherad kommune. Hovudføremålet med planen er næringsføremål knytt til eksisterande settefiskanlegg i Sunndal, lokalisert mellom Mauranger skule og Bondhuselva. I planen blir det også regulert for kaifasilitet for transport av fisk frå anlegget.

– I planframlegget ønskjer ein å kunna regulera for bygdelaget sitt bruk av skulen til mellom anna forsamlingslokale med uteområde for leik, opphald og parkering, samt moglegheit for at Eide Smolt leiger deler av bygget til kontor, lager og vaktbustad. Ein ser det slik at oppgradering av settefiskanlegget og vidare utvikling av den gamle skulen i Sunndal vil kunne ha positive synergieffektar for kvarandre og for bygda, skriv ABO Plan & Arkitektur Stord om reguleringsplanen.

Kaiareal

Dagens settefiskanlegg og areala eit stykke sør for anlegget er regulerte til næringsføremål i gjeldande kommuneplan frå 2018.

– Areala er også omfatta av faresone flaum, støysone frå fylkesvegen, samt faresone høgspent. Planområdet ved vassinntaket er LNF-føremål, bruk og vern av sjø og vassdrag, faresone flaum og bevaring naturmiljø. Areala knytt til gamle skulen/barnehagen er regulert til offentleg/privat tenesteyting, næring, samt støysone frå fylkesvegen, skriv ABO i varselet om oppstart av planarbeidet.

Arealet ved sjø til kai er regulert til næring, naust og bustad på land og fiske i sjø, samt ein mindre del som småbåthamn. Deler av arealet er omfatta av omsynssone bevaring kulturmiljø. Langs fylkesvegen er areala regulert til bustad, næring og offentleg/privat tenesteyting.

– Området er ikkje tidlegare detaljregulert, men vert koordinert med detaljregulering for Bondhus - Sundal turist- og friluftsområde, i regi av Kvinnherad kommune, skriv ABO Plan & Arkitektur i omtalen av planen.