Startar opp med influensavaksinering

Førstkomande veke startar Kvinnherad kommune opp med sesongens influensavaksine.

Vaksineringa blir gjennomført over fleire dagar, kor innbyggjarane kan få sesongens stikk både i festsalen på Husnes og i Rosendal samfunnshus. Frå veke 43 kan ein òg få influensavaksine hjå fastlegen.

I førstnemnde lokaler blir det lagt opp til influensavaksine 26. oktober, samt 2. og 9. november. I Rosendal blir det mogleg å stikka innom 24. og 27. oktober, samt 3. november.

Prisen for influensavaksine er i Kvinnherad kommune sett til 250 kroner, medan pneumokokkvaksinen kjem på 450 kroner.

I Kvam har for øvrig influensavaksinen fått ein prislapp 200 kroner, medan prisen på eit tilsvarande stikk ligg på 100 kroner i Ullensvang. På Stord har dei lagt seg midt i mellom desse to, der dei tilbyr influensavaksine til 150 kroner.

Rekordhøg førehandsbestilling

Det er veke 40 som markerer starten på influensasesongen for 2022/2023. Ifølgje Folkehelseinstituttet (FHI) sin ferske oversikt kjem det fram at det framleis er ein stabilt låg førekomst av influensa i Norge.

«I veke 40 blei det påvist influensavirus hjå 23 av 4256 testa personar. Delen positive prøvar var 0,5 prosent», skriv dei.

Vidare kjem det fram at det i år er rekordhøg førehandsbestilling til vaksineprogrammet, med 1,1 millionar dosar. Desse dosane skal vera motteke av kommunar og helseføretak i heile landet innan utgangen av veke 42.