Startar gestaltterapi-praksis på Husnes

– Eg er glad i folk, og erfarer at moglegheiter skapar me saman, seier ei engasjert Marit Teigen frå Utåker.

CV-en til Marit imponerer dei fleste, og avslører fort at pensjonistlivet kanskje ikkje er for henne. I heile 30 år har ho arbeidd innan rus- og psykiske helsetenester i kommune og spesialisthelsetenesta, både som behandlar, terapeut, rettleiar, fagkoordinator og leiar. Dei fire siste åra har ho jobba ved Folgefonn DPS i eit ambulerande team. Då ho var i kommunal jobb hadde ho eit avbrekk på tre år kor ho jobba i Bergensklinikkane og avdeling for rusmedisin ved Haukeland universitetssjukehus.

Ho er mellom anna utdanna sjukepleiar, gestaltterapeut og Marte Meo-terapeut.

Eit hjarta for metoden

– Du gjekk jo nett av med pensjon. Kvifor startar du med gestalterapi-praksis no?

– Eg har alltid vore interessert i gestaltterapi, og tok utdanninga ved sidan av jobb i 2007 til 2011. Eg har eit hjarta for metoden som inviterer oss til å leva her og no. Me lever i eit vitskapeleg samfunn der årsak-verknad står sentralt. Det er viktig, men fort å gløyma at det er eit kart og at det finst mange kart og ulike terreng. Gestaltterapi utforskar terrenget nærare saman med deg, og er mindre oppteken av «kvifor?», men heller «kva?» og «korleis?». I dette feltet skapast ofte ei bevegelsesflate av oppdagingar og nye moglegheiter, forklarar Marit.

I gestaltterapi er ein oppteken av å støtta deg i å finna ut og ta styring i ditt eige liv, anten om du slit med angst, låg sjølvkjensle eller andre ting. Vidare tenkjer ein at enkeltmenneske ikkje er eit isolert vesen, men i relasjon til sine omgjevnader, korleis me vert til saman med andre.

– Om eg ikkje hadde opplevd metoden som verknadsfull, hadde eg lagt det frå meg for lenge sidan. Gestalt er praktisk eksistensialisme, og fokuserer på tanke, kropp og kjensler på det som er, ikkje det som skulle vore. Ikkje for å akseptera, men på grunn av spenninga som ligg der, som skapar ein evolusjon når du er i den, det er endringas paradoks - å erkjenna det som er - i relasjonen mellom oss her og no. I tråd med eksistensialistisk tenking kan ikkje endring skje før me erkjenner og klart innser at noko er som det er, seier Marit Teigen.

Terapi eller rettleiing

På heimesida hennar får ein enkelt forklart kva gestaltterapi handlar om, samstundes har ho lista opp fleire typiske problem ein gestaltterapeut kan hjelpe med. Det kan eksempelvis vera om du er i ein vanskeleg livssituasjon og treng nokon å snakke med, slit med vonde kjensler, som skuld, skam, sorg, angst, nedstemtheit, eller om ein føler ein står fast i livet og ønskjer endring.

Frå januar av skal Marit i utgangspunktet ha kontortid to dagar i veka som gestaltterapeut der ho tilbyr terapi eller rettleiing. Sistnemnte er eit tilbod retta mot privatpersonar og bedrifter. Tenesta er eit supplement til det kommunale og spesialisthelsetenesta.

– Eg er godt nøgd med å ha kontor i Husnes Panorama. Lokala ligg både skjerma og sentralt til, i fine og rolege omgjevnadar. Kontoret skal eg forresten dela med dotter mi, Martha Varanes, som driv som naprapat éin ettermiddag i veka. Eg gler meg veldig til å setja i gang, sluttar ho.