Startar frisørsalong på fire hjul

Med fire hjul, ei saks og mykje utstyr tar Solveig Åkra frisørsalongen med ut på landevegen og tilbyr kvinnheringane heimeklipp på profesjonelt vis.

Åkra dreiv i årevis frisørsalong både på Husnes og i Rosendal, men ein skade i foten førte til at ho måtte omskulerast. Etter seks år med skule, praksis og jobb i helsesektoren, er foten endeleg bra.

Så no samlar ho det beste frå begge verdenar og startar opp «Frisør på hjul».

– Det at eg øydela foten i fjellet, heldigvis for det vil eg nesten seia. Det har gitt meg erfaring frå helsebransjen og gitt meg mykje. Eg likar å jobba med menneske, og hjelpa folk opp og fram. Difor tar eg no med meg erfaringane frå begge verdenar og samlar dei i eitt yrke, nesten som ein hjelpepleiarfrisør, seier Solveig Åkra til Grenda.

 

God terapi

Det var som helsefagarbeidar at Åkra fekk merka at det var behov for ein mobil frisør i kommunen. Ho merka at dei eldre og dei sjuke hadde stor glede av det å bli sett og føla seg vel.

– Når du er nede er det viktig at nokon ser deg, og alle har behov for å bli sett. Det merka eg då eg i sommar jobba på Valen sjukehus. Eg sminka og stelte to av pasientane der og såg kor mykje det gav dei. Etter eg var ferdig fekk eg tilbakemelding om at dette var veldig god terapi. Det var noko dei synest var heilt topp, og dei sette utruleg pris på

behandlinga, seier Åkra.

Allereie før ho er i gang har folk byrja å høyra kva tid dei kan booka ho. Og har faktisk fire jenter som skal bli nye og Hagetunet i avtaleboka allereie. Ho har tru på at behovet for frisør på hjul er stort i kommunen. Og tilbodet er for alle.

– Det var nokon som spurde om ein trengte å vera sjuk for å nytta tilbodet, det treng ein sjølvsagt ikkje. Det er for alle, anten ein berre treng ein klipp, om ein skal gifta seg, eller om ein til dømes har dårleg tid før eit møte, seier ho.

 

Blikkfangande kontor

Det blir ikkje vanskeleg å sjå at det er Solveig Åkra som kjem køyrande. Ein svart Mercedes Vito pryda av logoen hennar og eit stort bilete av Marilyn Monroe. Den trillande frisørsalongen skal innehalde alt det ein vanleg frisørsalong treng, lett flyttbart inn i huset til kunden. Det einaste kunden treng er straum og vatn, så kan Åkra rigga til ein frisørsalong heime hjå alle og ein kvar.

– Eg har vaskestol, klippeutstyr, speil og alt det andre som er naudsynt. Bilen blir på mange måtar eit varelager. Samtidig blir det lett å sjå at det er eg som kjem rullande. Eg har eit bilete inne i hovudet om korleis bilen blir sjåande ut, og eg gler meg veldig til å sjå resultat i oktober, seier ho.