Startar arbeidet med skogbruksplanen
Denne veka startar AT-Skog med kartlegginga av Kvinnherad-skogane. No er det også siste sjans til å få subsidiert utarbeiding av skogbruksplan for grunneigarar.
– I utgangspunktet skulle arbeidet som startar no vore i gang før sommaren, men AT-Skog har hatt mykje å gjera på. Dei har vore i Etne siste vekene, og no er det klare for Kvinnherad. Dei startar opp kartlegginga si i Kvinnherad i dag, tysdag, fortel skogeigar Trond Holmedal som har vore blant initiativtakarane til å få flest mogeleg samla om skogbruksplan.
– Skogeigarane har no ein siste sjanse til å melda seg. Over 50 prosent av skogeigedommane i Kvinnherad er påmeldte. Viss nokon trur dei har meldt seg på, men ikkje fått tilsendt kart, så ta kontakt, for då kan det ha skjedd ei misforståing ein stad, seier Holmedal.
Artikkelen held fram under annonsen.
Det blir kartmøte i Kulturhuset Husnes 9. november og på Hatlestrand 14. november.
No skal AT-Skog rundt og kartleggja skogane.
– Viss folk ser nokon som går og svirrar i skogen sin, så er det dei. Dei blir nok gåande i skogane har fram mot jul, seier Trond Holmedal.
Kostnaden med utarbeiding av skogbruksplanen er 70 prosent støtta av Statsforvaltaren. AT-Skog, som har hovudkontor i Porsgrunn, er ein av dei aktørane som står for kjøp og sal av skog, med både uttak av skog og skogpleie.