Starta nytt tilbod for vaksne danseglade

I fylgje Siw Regine Hovland Nilsen, ein av organisatorane til kurset og ein av initiativtakarane til den relativt nystarta danseklubben Dans’n, har ho lenge sakna eit dansetilbod for vaksne her i kommunen. Og det skulle det syna seg at ho ikkje er åleine om.

Øving og tålmod

– Det starta i grunn med at eg og Kjell Rune (Asmervik, initiativtakar og medorganisator, journ.merk.), som jobba saman tidlegare, innsåg at me begge likte å dansa og at me begge tykte det var synd at det stort sett berre skjedde eit par gongar i året i festlege lag, fortel Nilsen.

– Det er jo ikkje noko tilbod med dans for vaksne her i Kvinnherad, så då fekk me rett og slett starta eit sjølve. Førebels har me berre hatt 3-4 kveldar, men allereie fyrste kvelden var me 14 personar. Andre kvelden var me oppe i 25. Så det må jo seiast å vera ein bra start, fortset ho.

Det er tydeleg at dette har vore sakna, trass i litt få deltakarar på kurset. I fylgje Nilsen har det derimot si forklaring.

– Kurset vart i grunn hive saman på ganske kort varsel. Eg kjenner Raymi, instruktøren, frå før, så eg spurte om han ville hjelpa oss og det sa han heldigvis ja til. Men folk har jo planar, det er ikkje alle som har høve til å bli med på så kort varsel. I tillegg så var det nokre av dei som har vore med denne helga som måtte gå tidleg, forklarer Nilsen.

Intruktøren Raymi Elcacique, som kom eins ærend frå Bergen for å halda kurset, har dansa så lenge han kan hugsa.

– Eg vaks opp i Equador, og akkurat der var dei veldig glade i salsa, så det har eg gjort heile barndomen. Det er veldig bra at dei har starta opp dansegruppa her i Kvinnherad, det er både kjekt og sunt å dansa, seier han.

I fylgje Elcacique er det viktigaste når ein skal læra ein ny dans å øva og vera tålmodig med seg sjølv.

– Ein må gjera det om igjen og om igjen. Det kjem ikkje med ei gong, resultatet kjem seinare. Det er kjekt i dag, men det vil vera mykje kjekkare når ein kan det godt nok til å gjera ulike turar og prøva ting, fortel han.

– For menn tek det gjerne litt ekstra tid, for det er vanskelegare å læra seg å leia enn å fylgja. Men når dei kan det, så elskar dei det. Då sluttar dei til og med med å sjå på fotball, legg instruktøren til med eit smil.

Alle er velkomne

Deltakarane sjølve skrytte av både arrangementet, arrangørane og instruktøren, og fleire sa dei hadde sakne eit slikt tilbod.

– Eg vart med på kurset på grunn av instruktøren. Siw Regine og Kjell Rune er gode, men Raymi er framragande. Og dette gjer han berre på gøy, han tenar ingenting på dette kurset, skryt Bård Øvsthus.

– Eg har dansa ein del før då eg budde i Bergen, og har sakne eit slikt tilbod her. Eg er veldig glad for at dette har starta opp, sa ein av dei andre deltakarane Lise Rørvik.

Sjølv om det var fleire på kurset som hadde dansa før, var det langt i frå alle, og initiativtakar Siw Regine Hovland Nilsen håpar at endå fleire bli med å dansa med danseklubben.

– Alle er velkomne, det er god plass. Her på kurset så har det faktisk vore ganske likt mellom talet på menn og kvinner, men på dansekveldane våre derimot så har det vore fleirtal av damer. Så viss du lurer på kor damene er, så må du berre koma dit, konkluderer Nilsen smilande.