Starta fritidsklubb i Ølve

Ettersom det manglar kommunal fritidsklubb på nordsida, har fire mødrer gått i saman og fått på beina eit slikt tilbod. På første kvelden kom 23 barn for å kosa seg.

– Det er veldig kjekt å koma i gang! Me har planlagt dette ei stund, og no var det godt å setja det i verk, seier Lisbeth Andresen, som leiar gruppa som arrangerer fritidsklubben.

23 barn heimehøyrande frå Varaldsøy til Tysnes var på plass i gymsalen til montessoriskulen i Ølve.

– Me ville laga eit tilbod for barna i Ølve, Hatlestrand og Varaldsøy, og så har tysningane med tilknyting til montessoriskulen også blitt invitert, som dei einaste frå Tysnes. Fritidsklubben er ikkje ein direkte avleggjar av SÅ-prosjekt, men det er likevel inspirert av at me ynskjer å få til noko i bygdene og skapa levande bygder. Me har ikkje kommunal fritidsklubb her, og det er viktig å ha eit alternativ til aktivitetane til Strand-Ulv, forklarer Andresen.

Forslagskasse

Prosjektet har søkt og fått 60.000 kroner frå Ildsjel-fondet til Sparebanken Vest.

– Det er ein god start for oss, og dekker inn oppstarten. Me har kjøpt inn litt utstyr til hobbyaktivitetar, høgtalar til diskotek og takke til å steika lappar og annan mat på. Fritidsklubben får disponera skulen gratis, som er avgjerande for at me dette til. Då kan midlane må har fått gå direkte til aktivitetane til barna, utdjupar Andresen.

På opningskvelden hadde dei laga til ein forslagskasse på som barna kunne leggja forslag til aktivitetar i, til stor nytte for dei vaksne som arrangerer.

– Me vil prøva å laga til aktivitetar barna sjølve etterspør. VR-briller var det som gjekk mest igjen, så det må me prøva å få. Heldigvis var ikkje avstanden til våre planlagde aktivitetar så stor, smiler Andresen.

Innspela viser også ynsker om ulike kurs, som danse-, bake- og pizzakrus.

– Me må søkja for å få inn støtte til dette, men det er gode innspel, tykkjer me, kommenterer Andresen.

Byter kveldar

På opningsdagen var det spel som brettspel, fotballspel, sjakk, airhockey, perling og teikning det gjekk i. 10. klassingen Julie Bjørkelund laga både ballongfigurar og måla dei som ville i ansiktet. Serveringa var lappar og saft.

– På tysdag som kjem blir det morsdagsverkstad. Me syns det er mykje kjekt på gang, og har planar om karneval og diskotek. Kva kveldar me har klubben på kjem til å variera, for me kjem til å tilpassa det til å passa for oss fire arrangerer, men også for å unngå kollisjon med den same aktiviteten heile tida, seier leiaren.

Ein sak dei er fast bestemte på, er at det skal vera gratis, med lågast mogeleg terskel for å delta.

– Vegen blir til mens me går, og me våga å prøva og feila litt. Me kjem uansett til å tilpassa alderen etter aktivitetane som er frå gong til gong, seier Lisbeth Andresen, som driv tilbodet saman med Anette Ystaas, Susanne Ulvenes og Marion Ulvenes.

– Det er ein kjekk gjeng å jobba saman med, og me har i ein god driv om dagen, sluttar ho.