– Start opp med trening igjen!

Kvinnherad idrettsråd oppmodar dei lokale klubbane om å starta opp med organisert trening igjen.

Idrettsrådet har fått ein del spørsmål om organisert trening, og vil difor koma med ei klargjering til klubbar og lag i Kvinnherad.

– Idrettsrådet si klare oppmoding er at der det er mogleg å driva organisert idrett, så bør ein prøva å få det til. Så lenge ein held seg til regjeringa sine reglar, er det absolutt verdt eit forsøk, seier leiar Richard Erlandsen.

Han understrekar at alle særforbund knytt til Norges idrettsforbund har laga eigne koronareglar, og at ein også må følgja dei.

– Det er kjempeviktig å koma i gang, slår Erlandsen fast.

 

Maks fem

Han bed difor idrettslaga leggja til rette for at treningane kan gjennomførast i tråd med dei ulike retningslinjene.

– Det vil seia at ein merkar banen, heng opp plakat med koronavettreglar og set fram flasker med Antibac. For fotballen gjeld det elles å halda to meters avstand og vera maks fem i kvar treningsgruppe, inga spytting, ingen duellar, ikkje lova å halda ballen, ikkje nikka, og det er ikkje lov å flytta utstyr, ramsar Erlandsen opp.

Sidan det er grenser for kor mange som får trena på same feltet, medfører det at spelarane blir spreidde på fleire areal. Dette betyr at det også trengst fleire vaksne til å følgja med.

– Laga må difor samarbeida med foreldre og spelarar. For her treng ein hjelp, seier Richard Erlandsen.

 

Fungerer fint

Han understrekar at det er viktig med grundig gjennomgang av reglane, slik at ungar i 10-12 årsalderen og eldre kan greia å overhalda dei. For yngre barn kan det nok verta vanskeleg.

– Det er opp til trenarar og foreldre å avgjera om barna er modne nok til at dei kan følgja reglane. Sjølv er eg trenar for to jentelag. 7-8-åringane meiner vi det er sjanselaust å starta treningar for, men for 12-åringane fungerer det veldig fint. Gleda dei viser ved å få vera saman igjen, er større enn tapet av duellspelet. Verdien av å vera samla att fysisk er kjempestor, analyserer Erlandsen.

For dei som lurer på om det er lovleg å trena slik, så kan det opplysast at regjeringa opna for dette den 2. april. Kampar er det derimot førebels forbod mot fram til 15. juni. Sjølv om det er lov å trena, meiner Richard Erlandsen at det sjølvsagt ikkje skal vera obligatoriske treningar. Dei som er skeptiske skal få sleppa å delta.