– Ståltru på vidare vekst

I løpet av ein tiårsperiode har Roger Sjo og Øybygg ferdigstilt mange bueiningar i Landafeltet på Halsnøy, og fleire skal det bli.

Halsnøy, saman med Uskedalen, var dei store vinnarane i den nye folketalsstatistikken. Alle fire krinsane på øya auka innbyggjartalet i fjor.

Med sjøutsikt i alle retningar og kort veg til sentrum, har Landamarka byggjefelt vore ein suksess frå dag éin, og på mange måtar vore ein sterk bidragsytar til den positive folketalsutviklinga.

– Eg vil tru at det er den største bidragsytaren, i alle fall i dette området. For at folk skal flytta heim eller busetja seg ein plass er ein avhengig av at det faktisk er hus og leilegheiter tilgjengeleg. I tillegg trur eg tunnelen har hatt mykje å seia. Tidlegare frykta utflytta halsnøybuar at det ikkje var jobbar nok på øya, men etter at tunnelen kom på plass har også vi heile Kvinnherad som jobbmarknad, seier varehussjef Roger Sjo.

 

Flokkdyr

Og i Landafeltet er det i all hovudsak folk med røter på Halsnøy som buset seg.

– Det er mange i 20-30 årsalderen som flyttar heim att. Og vi menneske er jo flokkdyr, så om det er nokon vi kjenner godt som allereie har busett seg i eit byggjefelt, så blir det fort eit enklare val å følgja på, seier han.

 

17 nye tomter

Øybygg er på langt nær ferdige i Landamarka. Arbeidet med å utarbeida fleire tomter er godt i gang, og på sikt skal 17 nye tomter på plass i enden av byggjefeltet. I tillegg har dei store planar også i Eidsmarka.

–  Vi har ståltru på at Halsnøy vil vera den plassen i kommunen der folketalet aukar mest også i åra som kjem, seier Roger Sjo.