– Staben sit no og føl med på oppkøyringa
Fabrikksjef Jon Ola Ystgaard er sjølv ikkje til stades på Husnes, men melder om at det er sett inn ekstra bemanning for å vera på den sikre sida.
Publisert
Sist oppdatert
Ystgaard gjenfortel det han har blitt fortalt. Han skulle ønska han var tilstades på Hydro sjølv, men understrekar at staben er godt drilla og at det er veldig gode folk på vakt.
– Det er litt ekstra arbeid i det når ein legg inn straumen att. Vi har difor sett inn litt ekstra bemanning no, både på høgspenning og på elektrolyse, for å vera på den sikre sida, seier han.
Annonse
Attende på full last
Ystgaard fortel at hendinga skjedde rett over klokka 21 fredag kveld. Det var ein liten eksplosjon og kortslutning i ein likerettar. Følgjeleg la dei ut straumen på verket, noko som førte til at også dei nærliggjande bygdene, som er kobla over Hydro sitt anlegg, diverre mista straumen ei stund.
– 22.10 var straumen attende på verket, og vi var såleis utan i litt over ein time, seier han, og legg til at det følgjande blir å kartlegge kva som skjedde med likerettaren.
Elektrolysesjefen hadde, like før Grenda ringte Ystgaard, meldt i frå om at verket var attende på full last.
Annonse
Sjølv om hendinga også av Ystgaard blir omtala som lite dramatisk, trur han likevel det er litt spenning blant dei som er på vakt i kveld.
– Eg skulle verkeleg ønske eg var der, men vi har veldig, veldig flinke folk på vakt, i tillegg til dei ekstra som har rykka ut, sluttar han.
