Spylevæske servert med eit smil

Du fekk knapt parkert utanfor Circle K-stasjonen på Husnes fredag ettermiddag før Wivian Markhus eller ein av dei andre fem styremedlemmer frå NAF Kvinnherad hadde brekt opp panseret ditt og toppa opp tanken for spylevæske.

Saman med Markus hadde Anita Osmundsen, Atle Holm, Johnny Bidne og Karl Petter Vårdal rigga seg til på bensinstasjonen for å hjelpa til med skinnande ruter og ei påminning om at NAF Kvinnherad er ein triveleg organisasjon å vera ein del av.

50 år i NAF

Då NAF-gjengen var på sitt travlaste, kom Ernst Jaggi forbi og undra seg over kva dei heldt på med.

– Eg har nettopp kjøpt spyleveske, dessutan syklar eg i dag, smilte NAF-veteranen medan han fiska fram eit medlemskort som viste over 50 års medlemskap i organisasjonen.

– Det har vore viktig for meg å vera med. Då eg for nokre få år sidan trengte hjelp av NAF og ringte for å få veghjelpa, var han på sentralen overgitt over at medlemsnummeret mitt var så lågt. «Du har vore med lenge», sa han, referer Jaggi smilande.

Om han ikkje fekk flytande påfyll med seg, så fekk han iallfall med ein gåvepose frå NAF, som dei delte ut til alle andre dei var i kontakt med – så langt lageret rakk. Oppi der kunne han finna mellom anna ein påskequiz å bryna seg på.

– Me er så få at me må vera med alle når me gjer aktivitetar, enten det er denne eller andre. Også varamedlemmene trør til når det er som i dag. Påskeaksjonen til NAF er ein godt synleg aktiv dag, der organisasjonen får vist seg fram, meiner Markhus og Vårdal.

Og endå meir synlege blir dei jo når frontrutene er skinande reine.

Dårleg veg

Nokre føregåande år har NAF Kvinnherad mellom anna arrangert bilslalom, men det blir ikkje denne våren. I staden kjem dei til å bruka litt tid på å få til fokus på vegstandaren i Kvinnherad.

– Den er veldig dårleg. Når du først byrjar å leggja merke til det, så er det så mykje som skulle vore tatt tak i. Sjølv på relativt nye vegar er det ein del å setja fingeren på, kommenterer leiar i NAF avdeling Kvinnherad Karl Petter Vårdal.

Ettermiddagsøkta på fredag var han og resten av troppen godt nøgde med.

– Dette er ein positiv aksjon, i godt samarbeid med Circle K, sluttar gjengen før nye tankar skal fyllast opp.