Spurde om ekstra sosialhjelp i desember

I Formannskapet på torsdag tok Ove Lemicka (Frp) opp ei sak om ekstra tilskot til sosialhjelpsmottakarar før jul.

– Dei seinare åra har kommunen i desember kvart år gitt eit ekstra bidrag til sosialhjelpsmottakarar for å hjelpa på i den økonomisk krevjande julemånaden. Dette hjelpetiltaket må vi få til også i år, som har vore eit særdeles krevjande økonomisk år for innbyggjarane, la han fram.

Lemicka undra om ordføraren kunne svara på om det er ordna med å få gjennomført eit slik tiltak også i år.

– Eg har eit forslag om at vi yter ein tusenlapp til dei som har minst. Det er tøffe tider, sa Lemicka.

Ordførar Vegard Bjørnevik svarte at dette er organisert på andre måtar i år.

– Vi har pakkeutdeling, og i staden for å dela ut mat, deler vi heller ut summar. Inntrykket mitt er at dette er godt ivareteke, så eg har ikkje teke initiativ til å løfta ei slik sak i år, sa han, og fekk samtykkande nikk frå Silje Nordtveit Olsen (SV), som til vanleg jobbar i NAV.