«Sprudlande sydenstemning, magisk i løypa, draumeføre!»

Skarverennet si 37 km lange løype går langs foten av Hallingskarvet, frå Finse til Ustaoset. Det er Geilo IL som er arrangør, og årets renn var det 49. i rekkja. I følgje arrangøren vart det meldt om sprudlande sydenstemning i målområdet og draumeføre.

– Det var magisk i løypa og den beste turen vi har hatt, var den euforiske attendemeldinga frå deltakarane.

Magnar Rusten (49) frå Sandvoll deltok i konkurranseklassa for Ternen IL. I den same løypa som Terese Johaug avslutta karrieren med ein overlegen siger på 1:33:42 i kvinneklassa, staka Rusten inn på tida 2:18:18. Simen Hegstad Krüger stakk av med førsteplassen i herreklassa, på tida 1:25:56.

Trim 37km og 25km

I klassen Trim Finse, som også tel 37 km, var det fleire kvinnheringar som stilte. Eirik Skeie (40) frå Seimsfoss passerte målstreken på tida 2:23:27, følgt av Svein Bjarte Veastad (60) frå Herøysund: 2:53:35, Espen Hamarhaug (30) frå Ølve: 4:41:14, Kåre Røssland (57): 5:02:49, Merete Moe Røssland (55) frå Husnes: 5:03:06 og Egil Vaage (67) frå Sunde, som gjekk inn til tida 6:10:25.

Klassen Trim Haugastøl har ein distanse på 25 km. Denne distansen vart oppretta i 1996, og går frå Haugastøl til Ustaoset. Også her var det fleire kvinnheringar som stilte på startstreken: Anne Grethe Veastad (57) frå Herøysund gjekk inn til 5:44:02, Åse Krossøy Sahr (50) frå Sunde noterte ei tid på 5:44:50, Heidi Nyrud Uppheim (47) frå Husnes: 5:50:34, Linda Tofte (47) frå Herøysund: 5:50:28, og Hjørdis Emmerhoff (44) frå Halsnøy passerte målstreken i strålande sol, til tida 5:56:47.

Skarverennet vart arrangert for første gong i 1974, og er verdas tredje største turlangrenn.

Det var fleire kvinnheringar på deltakarlistene enn dei som her er nemnd, men ikkje alle som var påmeld deltok.