Sprella godt på Sunde

– Me må vera nøgde med starten på dagen, meinte Morten Hoem då Grenda trefte han på kaikanten i båthamna på Sunde.

Han kunne konstatera at det tetta seg til med nyfikne, og både yngre og eldre hadde funne vegen til SundeSprell. No nytta dei seg av eit breitt tilbod i aktivitetar som var organisert for dagen.

Blant dei mest populære var å kasta svamp på Lars Kvåle.

– Eg blir treft ein del gongar, eg blir jo det, smilte han tappert ikledd våtdrakt og med fjeset gjennom opninga i Svampe-Bob-plata.

Lucas Offerdal (8,5 år) var ein av dei som prøvde lukka som svampekastar.

– Eg trefte ikkje. Var grei og bomma, smilte han etter sine tre forsøk.

Dei som ville kunne snikra seg båt eller delta i fiskekonkurransen til sjøs. Dei kunne også prøva fiskelukka i det vesle bassenget, der båtane i bassenget eigentleg var lodd, og båtnummeret på kjølen tilsa kva premie du vann.

Mila Voitechovic (5,5 år) frå Halsnøy tok to lodd, og kunne nøgd registrera at ho plukka med seg ein førstepremie og ein tredjepremie, sjølv om båtane var vrine å få på kroken.

Inne i lokala til Sunde Båtlag var det sal av lefser og lekre kaker, på kaien vart det grilla og fire-fem lekre doningar vart vist fram.

– Det er kjekt å få gjera noko slikt som dette igjen, etter to år utan tilstellingar her. Og ein plass må me byrja når me tar opp att SundeSprell, og me er nøgde med oppslutnaden, seier Morten Hoem.

På kvelden var det også eit reint vaksenarrangement i lokala til båthuset. Der vart alle 150 billettane rivne vekk.