Spreier bodskapen til sine medsøstrer

– Det var ein veldig vellykka kveld med heile 182 tilhøyrarar, fortel Bente Haugen i Rosendal helselag.

Føredragshaldar Anita Silden Prante er høgskulelektor, jordmor og forfattar. Tidlegare i april kom ho ut med boka «Menopauseboka».

Boka har som formål å løfta overgangsalderen ut av skammekroken. Prante skriv om korleis ein kan gjenkjenne symptom, læra seg å ta kontroll over situasjonen og komma seg sterkare og klokare ut av denne fasen som alle kvinner går gjennom.

– Det er så mange symptom som ein kanskje ikkje med ein gong trur at har med overgangsalderen og gjera. Prante fortalte om dei med humor, ho var som eit fyrverkeri på scena og folk lo og koste seg, fortel Haugen og legg til;

– Det var mange der med sjølvinnsikt som lo godt når ho fortalde om kor irritert ho kunne bli når mannen tygga høgt eller pusta. Då var det nok fleire som kjente seg igjen.

Irritasjon og galskap

Mange kvinner er ukjente med symptoma rundt overgangsalder, og kjenner såleis ikkje igjen fasen når den kjem slentrande. Det har vore lite forsking rundt mykje kvinnehelse, og ting som overgangsalder har vore lite snakka om.

– Hovudfokuset var kva som skjer i kroppen i 30-50års alderen. Det var nok mange som fekk seg ein aha-oppleving, og som kanskje skjønte at dei ikkje er blitt galne, fortel Haugen.

Damene i Rosendal helselag og Omvikdalen bygdekvinnelag har fått mange gode tilbakemeldingar etter føredraget.

– Mange seier at det var så nyttig å høyre på. Det var eit morosamt og informativt føredrag om noko som ikkje blir så belyst sjølv om det burde vere det. Kvinna er primus motor i dei fleste familiar, og har ho det bra har familien det bra.

For mange kvinner treff overgangsalderen medan dei har tenåringar i hus. Dette medfører at det er mykje hormonar i sving, og kan nok fyra oppunder fleire situasjoner.

– Då er det greitt å vera obs på både symptomar og anna, og gå etter føre var-prinsippet, seier Haugen, og legg til;

– No har vi 180 kvinner som kan spreie det gode bodskap til sine medsøstre og som kan støtta kvarandre i at ein ikkje er galne, og at ein ikkje skal godta det fyrste svaret ein får hos legen.

Vellukka samarbeid

Rosendal helselag og Omvikdalen bygdekvinnelag er nøgde med kvelden og samarbeidet og Haugen ser ikkje vekk frå at det blir arrangert fleire slike føredrag.

– Det finnest mange tema ein kan vela, vi arrangerer gjerne fleire føredrag om kvinnehelse, om helse og om livet. Det som kan vera livsforbetrande. Vi vil få fram nyare forsking rundt kvinnehelse, seier Haugen.

Blant dei 182 frammøtte var to menn. Haugen skulle ynskja det var fleire menn og fleire legar som kom for å høyre på og vonar det kjem fleire ved neste anledning.