Spør om Nordic Mining: – Må gjerast på ein berekraftig måte

Det er Per Harald Havnen Löfgren Johansen (Ap) som har sendt inn spørsmål om Nordic Mining sine planar for kvartsutvinning i Kvinnherad. Han viser til at gruveselskapet Nordic Mining no har inngått grunneigaravtalar og intensjonsavtale om utbygging med eit multinasjonalt selskap, samt har fått løyve frå Direktoratet for mineralforvaltning til å setja i gang eit undersøkingsarbeid for kvartsutvinning.

Jobbar vidare med kvartsprosjektet

Utvinninga skal skje på lokasjonen Nesodden, som ligg mellom Svoldalen og Lyngstranda, opp mot Nordlifjell.

«Selskapet gjennomførde prøveboring og lagde analysar av førekomsten i 2015. Desse analysane visar at kvartsen er av svært høg kvalitet og kan brukast til høgteknologiske produkt innom elektronikk, solceller og liknande. Det er estimert at førekomsten er på vel 4 millionar tonn kvarts og har ein berekna verdi på fleire titals milliardar kroner», skriv Johansen.

Avgjerande betydning

Han tykkjer prosjektet utan tvil er interessant.

«Den vestlege verda treng tilgang på mineral, kommunen treng tilgang på arbeidsplassar, og det vil vera gode økonomiske ringverknadar i lokalsamfunna. Samstundes veit vi at gruvedrift kan ha stor negativ konsekvens på kringliggjande natur og miljø. Området opp mot Nordlifjell er eit område som i liten grad er påverka av menneskeleg aktivitet, og vi veit at Nordic Mining dei siste åra har hatt store konfliktar tilknytt sjødeponi for gruveavfall i Førdefjorden», analyserer Per Harald Havnen Löfgren Johansen.

Han legg til:

«Dersom eit gruveprosjekt skal vera aktuelt i Kvinnherad, er det av avgjerande betydning at dette vert gjort på ein berekraftig måte med minst mogleg miljøavtrykk. Då er det viktig at Kvinnherad kommune set seg i førarsetet, er framoverlent og allereie i ein tidleg fase har dialog med gruveselskapet, som tek føre seg både forventningar, utfordringar og moglege løysingar ved eventuell gruvedrift i området».

Fire spørsmål

Johansen avsluttar med fire konkrete spørsmål:

1. Er Kvinnherad kommune orientert om prosjektet, framdriftsplan og vidare prosess frå Nordic Mining?

2. Har Kvinnherad kommune oppretta kontakt med Nordic Mining?

3. Har det blitt gjennomført, eller føreligg konkrete planar, om møte mellom Nordic Mining og Kvinnherad kommune?

4. Ber vidare om at Nordic Mining vert invitert for å halde ei orientering for kommunestyret om prosjektet, dersom selskapet finn resultata frå undersøkingsarbeidet tilfredsstillande og ønskjer å gå vidare i prosessen.