Spør om kunstgrasforureining

Han byrjar spørsmålet med at han synest at det var bra engasjement i kommunen når det galdt å plukka plast i fjøresteinane, og at det òg var mange politikarar som viste seg fram, og det er bra.

– [Eg] vonar at det store engasjementet blant folk held fram også når media ikkje er på plass. Men me bør samstundes arbeida aktivt for å redusera sjansane for at plast hamnar i fjorden. Dette kallar me «føre var» prinsipp. Underteikna har i inneverande kommunestyre-periode hatt spørsmål før angåande plast/gummigranulat på idrettsbanane i Kvinnherad. Diverre er eg nøydd til å ta det opp på nytt, skriv Zimmermann.

Han viser til at det er tredd i kraft nytt lovverk om oppsamling av gummigranulat på kunstgrasbanane frå 1. juli i fjor.

– No har statsforvaltaren i Vestland begynt å undersøkja om kommunane held seg innafor lovverket. I veke 39 blei 10 kommunar i Vestland undersøkte, og 8 av dei fekk altså rapportert avvik. Hadde Kvinnherad vore med her, hadde vi òg vore med i det gilde selskapet med dei som ikkje fylgjer lova til punkt og prikke, fordi vi ikkje har eit skikkeleg system på dette, hevdar MDG-politikaren.

– Me er iallfall ein potensiell lovbrytar, fordi eg er klar over at det finst overgangsbestemmelsar. Men eg er ikkje så sikker på om miljøet rundt oss, dvs. fjorden og naturen, handterer dei overgangsbestemmelsane med same synet. Det er faktisk lov å gjera noko før. Ved synfaring på fleire kunstgrasbanar i Kvinnherad kunne eg ikkje sjå spor etter tiltak som var i nærleiken av oppsamling for gummigranulat. Etter Miljødirektoratet sitt talmateriale hamnar det faktisk 6000 tonn gummigranulat i naturen kvart år, og det seier seg sjølv at dette er uhaldbart, skriv Zimmermann i samband med spørsmålet sitt.

Det han spør ordføraren om er:

«Har Kvinnherad kommune tenkt å gjera nok med saka i nærmaste framtid? Viss ja: Har Kvinnherad kommune påbegynt arbeidet, og kva tid vil det i så fall vera ferdigstilt?»

Neste kommunestyremøte er torsdag 27. oktober.