Spontant laksestunt med godt besøk
– Me visste ikkje kva me skulle forventa, og håpte på kanskje 50. No har gjengen frå Olaløo servert over 250 smaksprøvar.
Publisert
Sist oppdatert
Det sa samfunnskontakt i Eide Fjordbruk Vidar Hjartnes då oppdrettsselskapet på kort varsel skipa til laksesamking og besøk ut til laksen i merdane.
– Me snakka internt om at me skulle funne på noko, og kikka vêrmeldingane for laurdag og heiv oss rundt. Me såg ikkje at me kom til å kollidera med noko anna lokalt, så då var det berre å sjå om me kunne få til noko, seier Hjartnes.
Annonse
Det balla på seg litt, vedgår samfunnskontakten, som såg Olaløo stilla med eit halvt dusin servitørar, Arne Torget stilte med stuntpoesi og Rødne stilte «Hardangerfjordekspressen» til disposisjon.
Sistnemnde vart fylt til siste sete då båten skulle ta dei nyfikne ut til oppdrettsanlegget på Hågardsneset utanfor Snilstveitøy. Der fekk alle dei 132 som var med båten koma utpå anlegget og sjå korleis fisken har det merdane, og også korleis matinga går føre seg.
Tippa laksevekta
Før båtturen var det også høve til å gissa vekta på ein heil, velvaksen laks som Hjartnes hadde tatt med seg til Rosendal.
Annonse
– Eg vil ikkje seia kva eg tippa, smilte Per Flatebø i det han leverte frå seg lappen det stod 3735 gram på.
Det var innanfor 10 prosent feilmargin, men ikkje like presist som det Magnhild K. Fosse tippa. Ho trefte på grammet med sine 4100 gram, og vann med det ein runde med full servering på restaurant Iris på Salmon Eye.
– Vêret kunne alltids vore betre, men me kan ikkje bry oss om vêret her me bur, då får me ikkje arrangert noko. Og så er det kjekt viss dette spontane arrangementet fører til at litt fleire besøker Folgefonnsenteret og kafeane i Rosendal, meinte Hjartnes medan køen for å koma seg på båten drog seg til.
