Spesiell adventskalender: – Til glede og ettertanke

Elevane på Valekrossen har jobba ilag med lærarane for å finna gode ord og uttrykk til glede og ettertanke for alle som går forbi eller inn døra.

– Eg tenkte at eg hadde lyst til å laga til noko som kunne spreie litt glede for dei som trør inn døra her. Mange som går forbi her har det ikkje så lett, og fram mot jul blir det ofte litt ekstra tøft. Tanken var at nokre gode ord kunne gle og inspirera folk, fortel lærar ved Valekrossen skule Ingrid Røstbø.

– Vi har jobba med dette på formgjevingstova no fram mot advent, og elevane har bestemt kva som skulle få henga oppe, fortel ho.

Dei fine orda er blitt skrive på hjarta som er blitt dekorerte slik at dei ser ut som peparkakehjarta med melisglasur. Kvar dag snur fyrste mann som kjem eit nytt hjarta.

Refleksjon og ettertanke

Elevar og lærarar har jobba godt med prosjektet på formgjevingstova, og har skapt eit lysglimt i det som kan vera ein noko tung kvardag.

– Det har vore veldig kjekt å jobba med dette. Å leita etter dei rette orda har bidratt til refleksjon og ettertanke. Vi har hatt mange gode samtalar med elevane om kva meining gode ord kan ha, fortel fagkoordinator Julie Holmedal Askeland.

– Fleire har gjett tilbakemelding om at det er blitt eit høgdepunkt. Mange pasientar kjem ned kvar dag for å lesa dagens ord, ta bilde og senda vidare til venner og kjente, legg ho til.

Vi treng alle å høyra nokre gode ord innimellom, og kanskje spesielt i julestria er det viktig.

– Mange er veldig i si eiga boble i juletida, men kanskje ein kan bli inspirert til å ta ein telefon eller invitera på ein kaffikopp. Å løfta blikket, senka skuldrene og roa ned er viktig, seier Holmedal Askeland.

Ynskjer fleire elevar

Nett no har Valekrossen skule 27 elevar, noko som er ny rekord.

– Elevane gjev uttrykk for trivsel og meistring. Fleire har sagt at om det ikkje var for dette tilbodet, hadde dei ikkje gått på skule. Vi set veldig stor pris på at dei då i tillegg har lyst til å bidra til fellesskapet og skapa gode opplevingar for andre, fortel Røstbø.

I januar arrangerer Valekrossen open dag. Dei vil visa at det ikkje er eit sjukehus ein kjem til, men ein skule.

– Det er litt stigma rundt det å gå her, men no har vi byrja å bryta det og klarar å visa kven vi faktisk er, fortel Holmedal Askeland.

Skulen har elevar frå Kvinnherad, Stord, Bømlo og Etne, og dekker såleis heile Sunnhordlandsregionen.

– Det er mange der ute som treng eit slikt tilbod som dette. I år har det vore fullt i fleire fag, det har vi ikkje hatt før. I tillegg har vi hatt veldig få utskrivingar. Det er motiverande å gå på jobb når vi er med på å få ungdommane gjennom skulen, fortel Holmedal Askeland og Røstbø.