Sparer tusenvis av kilowattimar

Fredag gjorde Kvinnherad Elektro seg meir eller mindre ferdige med eit energiøkonomiserande grep som monnar i Kvinnherad kyrkje.

– Me har følgt råda til Riksantikvaren og skaffa omnar som passar til kyrkjene. Det er mange kyrkjer rundt om i landet som har fått tilbod om å gå over til desse omnane, og får subsidiert ein stor del av innkjøpssummen av Riksantikvaren når ein kjøper dei inn. Dette har me fiksa her og på Eid, og me sparer ganske mykje straum på dette, seier kyrkjegardsarbeidar Helge Furdal.

Kvinnherad Elektro har gjort i Rosendal, medan det er Into Elektro som har installert omnane på Eid.

Sparer straum

Når Furdal samanlikna forbruket i januar 2022 mot 2021, så demonstrerer det greitt kor mykje det monnar.

– Det var 9000 kilowattimar mindre no her i Kvinnherad kyrkje, som er den desidert dyraste i drift. Det er jo greitt å få redusera forbruket litt, kommenterer han.

Framover kjem kyrkja også til å ta i bruk omfattande varmestyring.

– Me nyttar ein app til å leggja inn arrangement, og så hentar systemet inn både ute- og innetemperatur, og startar då oppvarminga i tide til å ha rette temperaturen i kyrkja når arrangementet tar til. Er det ti grader ute, så startar oppvarminga seinare enn om det er minus to, illustrerer Furdal.

– Uavhengig av om me har desse omnane eller andre omnar, så er dette eit system me vil installera på dei kyrkjene som har størst straumforbruk. Slik prisane er, så er det mykje pengar å henta på slik styring, og samtidig er det ein miljøgevinst i å bruka mindre energi, legg han til.

Nye toalett

Det er ikkje berre varmeanlegget som blir oppgradert. Både kjøkkenet i sakristiet toalettet har blitt henta opp til 2020-talet.

– Denne kyrkja er ei av dei som er mest brukt. Tilstanden på kjøkken og toalett her har ikkje vore god nok, og ei oppgradering har stått på ønskelista lenge. Kyrkjeverje Torstein Aarthun er flink å pusha på og flink på å skriva dei rette søknadane til dei rette instansane, og til dømes Riksantikvaren har mykje han skulle ha sagt om kyrkja her. Heldigvis kom dei kjapt fram til at dei ikkje trengte å involvera seg i oppgraderinga på toalettbygget, forklarer Furdal.

Kyrkjegardsarbeidaren har gjort mykje av jobben med å oppgradera toaletta ved Kvinnherad kyrkje, saman med kollegaen Alf Jarle Langeland.

– Det var viktig å få toaletta meir universelt utforma, i tillegg til modernisert på fleire vis. No har me både toalett og kjøkken som me kan vera nøgde med, sluttar Helge Furdal.