Spanderte frukost på ministeren

– Det er alltid godt å starta morgonen med skikkeleg frukost, kvitra ei morgonfrisk Marte Mjøs Persen frå kantinebordet på Kvinnherad vidaregåande skule.

Ho er for mange betre kjent som arbeids- og inkluderingsminister i Støre-regjeringa, men det var truleg fleire av elevane som kjente att Thea Vaage. Treeininga vart fullbyrda av fylkesordførarkandidat Stian Davies.

– Det er veldig kjekt å sjå at dette tiltaket vert nytta av elevane. Dette er resultatet av politikk i praksis, meinte Stian

Morgonmåltidet

Arbeidarpartiet stilte med eit talrikt lag under frukosten på KVV. Arbeids- og inkluderingsministeren slo seg ned på bordet med, og då følgde ordførarkandidat Thea Vaage og fylkesordførarkandidat Stian Davies seg ned ved sida.

– Eg håper og trur det er god draghjelp, og så er det kjekt at dei kjem og ser korleis me har det. Marte har vore her eit par gonger før, med likevel bra at ho tar turen no også, meinte Vaage.

På KVV var det frukost i kantina som stod på sakskartet. Med ei kvitostskive i handa hos både minister og kandidatar, vart det også frukost i praksis.

– Greie folk, konkluderte Emely etter ein liten prat med statsråden.

– Me har snakka litt om skulemat og skulevaldebatt, seier Marte Mjøs Persen når Grenda avbryt praten på morgonkvisten.

Tre dagar i veka er det graut, to morgonar står brødmat på menyen.

– Me har snakka om frukosten som dei får på skulen, om dei liker det og kva som er favoritten, seier Thea Vaage, som sjølv er lærar ved skulen.

– Graut er favoritten, då et eg her. Når det er brødmat, så et eg heime, seier Emely.

– Eg ser det er litt ulike meiningar om kva som er best, kommenterer ministeren med eit smil.

Stian Davies var nøgd med at tilbodet vart brukt.

– Dette har vore gjenstand for ein diskusjon i fylkeskommunen, og det gledelege er at det blir brukt. Dette blir tilrettelagt på ulikt vis frå skule til skule, men det er populært andre stader også. Her passar det fint med skulebussane, og det gjer det kanskje lettare å nytta seg av tilbodet, meiner fylkesordførarkandidaten.

For følgjet gjekk turen vidare til møte med Nav og så til Halsnøytunet.

– Me har eit spennande prosjekt på Halsnøytunet, der fleire har fått auka stillingsprosenten sin for å sjå om det kan påverka sjukefråværet og trivnaden, forklarte Vaage.

– Og så har dykk ein spennande garanti til at ungdommane får læreplassar. Det er bra for ungdommane som får lærlingplassar og for kommunen som får tilgang på dyktige medarbeidarar, skrytte Mjøs Persen til Vaage.

For Vaage hadde det ein definitiv gevinst å ha med ein så sentral politikar som Mjøs Persen.

– Du får med ein del synspunkt frå stortingspolitikken også, og det er veldig fint. Me hadde klart oss utan ministerbesøk, men det er likevel stas, og det gjer det lettare å få merksemd for oss og våre saker, meinte 27-åringen.

Fylkesvegar

Stian hadde Bergen, Førde, Lærdal, Aurland, Husnes som reiserute dagen før han stilte i kantina til KVV. Det gav nærkontakt med vegane i kommunen.

– Eg er glad for å få vitja heile fylket, og får sett både at det er skilnader på oss, samtidig som me er like på mykje. Samferdsle er noko Kvinnherad er særs opptatt av. Kvinnherad har jo ingen riksvegar, men eit stort fylkesvegnett. Eg har køyrt på desse vegane sjølv, og det treng monalege oppgraderingar, for å seia det mildt, kommenterte Davies.

– No må me syta for to ting: Meir pengar til veg frå staten, for me treng eit fylkesvegløft frå staten, og så må me som fylkeskommune løyva meir pengar til veg. Å ta vare på kvardagsvegane våre, er det viktigaste framover, vurderte han vidare.

Davies konstaterte at fylkespolitikken er viktig for folk, og kanskje spesielt i Kvinnherad.

– Så eg håper folk hugsar å bruka stemmeretten i fylkesvalet i år også! Ta med begge lappane, og stem på vegge vala. Syt for at vegane blir betre og at elevane her får skuleplass. Fleksibel skyss til Kvinnherad er ein av sakene som er oppe til fylkestinget no snart, og det skal me halda trykk på, lova Davies.

For Thea Vaage er det no oppløpssida igjen av valkampen.

– Er du sliten no, Thea?

– Litt, men det er berre ei lita veke igjen. Det er veldig kjekt, men det skal bli godt å sova ut nokre morgonar etter det erover. Det er noko anna å driva valkamp når du er ordførarkandidat, enn når du skulle dytta fram ein annan kandidat, vedgår Vaage.