Spanande fagdag på kjøkenet
Lone Sofi Silke frå Hatlestrand er elev ved kokke- og servitørlinja på Fusa vidaregåande skule, førre onsdag fekk ho og resten av klassekameratane besøk av eit knippe dyktige kokkar og fagarbeidarar frå ulike delar av bransjen.
Gjennom eit samarbeid med direktøren for mat og drikke ved Fjordtind Hotels Christer Økland, laga skulen til ein dag fylt med fagleg påfyll og inspirasjon der elevane fekk sjå kva mogelegheiter bransjen har å by på.
Ny oppleving
Annonse
– Det var veldig spanande, og me lærte mange nye ting som me ikkje har hatt mogelegheit til å læra tidlegare. Til dømes lærte me om prosessen frå ein fisk blir fiska til den kjem til kunden. Det har me ikkje høyrt så mykje om før, i tillegg fekk me veta litt om forskjellige vinar og alkoholfrie drikker. Det har me heller ikkje vore innom før, ikkje sider i alle fall, sa Silke i etterkant.
– Me fekk også lov til å laga vår eigen rett på 30 minutt. Det var ei ny oppleving, og veldig spanande. Eg valde ein rett med steikt fisk, fortsette ho.
– Har du tenkt på kva retning du vil gå etter at du er ferdig med skulen?
– Nei, det har eg ikkje bestemt meg for endå, men eg vurderer å studera vidare om vinar og drikkevarer. Eg tykkjer det er spanande måten det vert laga på, og korleis alle dei ulike vala og stega i prosessen kan påverke sluttresultatet. Det er så små ting som kan påverke, i tillegg til at ein kan laga så mykje forskjellig, svarte Silke engasjert.
Annonse
Stor mangel
Restaurant- og matfaglærar Siv Bergtun Tombre fortel i ei pressemelding at blant dei som deltok på fagdagen var Kenneth Larsen og Raymond Grimstad frå Lerøy, Michelin-kokken Erlend Stueland frå restauranten Buer i Odda og eplebonden og sider- og eplemostprodusenten Geir Henning Styve frå Styve Gard. Denne kvartetten synte elevane alt i frå filetering av fisk, til ulike smakskombinasjonar og viktigheita av god drikke til maten.
– Stueland gav elevane ein fantastisk demonstrasjon på korleis bruka fisken og skaldyra i rettar som fekk smaksorgana til å lengta etter meir. Dei fekk også prøva seg sjølve på smakskombinasjonar, i tillegg til å laga flotte opplegg på tallerken, fortalde Tombre i pressemeldinga.
– Elevane fekk også høyre fleire gode historier om korleis desse ulike kokkane hadde utvikla seg frå nyutdanna fagarbeidarar til ulike spanande jobbar. At breidda er så stor og at mogelegheitene er mange vitnar deira bakgrunn godt om, la ho til.
Tombre fortalde også om ei næring som har eit stort behov for kvalifisert utdanna personale.
– Det er stor mangel på kokkar og servitørar i bransjen, så med denne dagen håpar me å setja lys på eit spanande fagfelt som vil gje ungdomen mange og interessante karrierevegar, avslutta ho.
