Sp la fram forslag til ny struktur - opnar for å leggja ned fleire skular

– Vi er sjølvsagt spente på møtet i levekårsutvalet i dag. Senterpartiet er vel det fyrste partiet som ikkje berre vil vidareføra strukturen som før. Og så er vi spente på om nokon andre kan vera med og sjå på forslaget vårt. Vi prøver å få eit så breitt fundament som mogleg, sa Svein-Åge Vangdal då Grenda snakka med han i går.

Det er Vangdal som saman med Jonny Lygre har forfatta forslaget, etter at saka var tema på medlemsmøtet til Sp måndag kveld.

– Ja, vi hadde ein lang og god diskusjon der, men samla oss ganske greitt om dette forslaget, kommenterte Vangdal.

Her er Sp sitt forslag i sin heilskap:

Kvinnherad har ei stor breidde og mangfald av skular og barnehagar. Ulike satsingsområde, god samhandling og inkludering, skapar individuelle og gode skulemiljø. Uavhengig av utforming og storleik av skule- og barnehagebygg, har ein over generasjonar opparbeidd gode lærings- og utviklingsarenaer for born og ungdom i Kvinnherad.

Del 2 Handlingsdel til temaplanen:

Framlagt Handlingsdel frå kommunedirektør vert vedteken, med eitt tillegg om at minstekravet til gruppestorleik i SFO kan redusert til 3 ved dei minste skuleeiningane.

Del 3 Organisering av barnehagar og skular:

Skule- og barnehagetilbodet vert organisert i tråd med senterstrukturen i Kvinnherad 2050, slik at det i kvar av dei fire ungdomskulekrinsane er barneskular og barnehagar med akseptabel reisetid for alle. I kortare periodar med underdekning av barnehageplassar får ein tilbod om plass utanfor krinsen. Ved kvar av ungdomsskulane skal det etablerast lokale for ungdomsklubb.

Halsnøy ungdomskulekrins:

Trongen for barnehageplassar vert dekka av Espira Halsnøy barnehage. Halsnøy barneskule og Øyatun ungdomsskule vert vidareført.

Husnes ungdomsskulekrins:

Myrane barnehage på Husnes, Sunde barnehage og Bringedalsbygda barnehage vert vidareførte. Undarheim barnehage vert lagt ned 2022. Kommunen går i forhandling med Akasia barnehage på Valen om kjøp. Ved trong for nye barnehageplassar i krinsen, skal utbygging av Sunde barnehage prioriterast.

Det vert inneverande år starta eit forprosjekt for ny barneskule på Husnes med plass til elevane frå Undarheim og Sunde skular, med representasjon frå foreldre, elevar og tilsette ved dei berørte skulane, og ungdomsrådet. Endeleg vedtak om bygging av ny skule og nedlegging av Sunde skule når forprosjektet er avslutta.

Det vert 2022 starta forprosjektering av ein utvida Valen skule med plass til elevane ved Valen og Skarveland skular, med representasjon frå foreldre, elevar og tilsette ved dei berørte skulane, og ungdomsrådet. Skarveland skule vert lagt ned når utbygd Valen skule står ferdig.

Bringedalsbygda skule vert vidareført.

Rosendal ungdomsskulekrins:

Trongen for barnehageplassar vert dekka av Fus Rosendal barnehage, Omvikdalen barnehage og Uskedalen barnehage. Kommunen går i forhandling med Dønhaug barnehage i Uskedalen om samarbeid/kjøp. Ved trong for nye barnehageplassar i krinsen, skal utbygging av Omvikdalen barnehage prioriterast.

Mauranger barnehage vert lagt ned hausten 2021, Mauranger skule hausten 2022. Elevane skal primært overførast til Malmanger skule, men det skal framforhandlast avtale med Ullensvang herad, som sikrar at foreldre som ynskjer det kan få plass i barnehage og skule i Odda.

Det vert i planperioden starta eit forprosjekt for eit nytt skule- og idrettssenter i Rosendal, med representasjon frå foreldre, elevar og tilsette ved Malmanger, Omvikdalen og Mauranger skular, Rosendal ungdomsskule og ungdomsrådet, som skal innehalda ny barneskule for elevane på Malmanger, Omvikdalen og Mauranger skular. Endeleg vedtak om bygging av ny skule og nedlegging av Omvikdalen skule når forprosjektet er avslutta.

Uskedalen skule vert vidareført. Åkra barnehage og skule vert vidareført, med utviding av tilbodet ved barnehagen frå 4 til 5 dagar/veke.

Hatlestrand ungdomsskulekrins:

Hatlestrand barnehage vert bygd ut for å kunne dekke trongen for barnehageplassar i krinsen. Ølve barnehage vert lagt ned hausten 2022, når utvida Hatlestrand barnehage står klar. Varaldsøy barnehage vert vidareført som avdeling under Hatlestrand barnehage.

Hatlestrand skule 1-10 vert vidareført, og utbygd for å husa fasilitetar for heildagskulepilot frå hausten 2022.

Del 4 Heildagsskule:

Heildagsskule skal prøvast ut som pilot ved Hatlestrand skule for årstrinna 1.-7. klasse frå og med skuleåret 22/23. Ved nybygg og rehabilitering av øvrige skulebygg i kommunen, skal det leggast til rette for framtidig heildagsskule.