Sov godt – nytt kurs til hausten

Frisklivskoordinator Martha Teigen Varanes fortel at det er ein del som slit med søvn i kommunen, og basert på andre stader som tidlegare har gjennomført dette kurset er det meldt om god effekt blant deltakarane. Ho håpar såleis at kurset kan vera til hjelp for fleire.

– Kurset er utforma av Helsedirektoratet, og kjem som eit ferdig opplegg. Her vil ein få råd om god søvn og dei som deltar skal mellom anna skrive søvndagbok, fortel ho.

I informasjonsskrivet om tilbodet kan ein lesa følgjande: «Søvnkurset ‘Sov godt’ er eit kurs for personar som slit med å sovne om kvelden, vakne for tidleg om morgonen, søv uroleg og/eller har mange oppvakningar i løpet av natta. Kurset er for deg som ønskjer å forbetre søvnkvaliteten utan bruk av medisin.»

Fordeler ved medikamentfri behandling

Helsedirektoratet påpeiker i sin rettleiar for kurset at søvnmangel påverkar immunforsvaret og korleis ein reagerer på skadar og stress. Dei viser også til at det er ein samanheng mellom dårleg søvn og hjarte-kar-sjukdommar, overvekt og diabetes. Medikamentfri behandling av insomni og søvnvanskar har, i følgje rettleiaren, vist seg å ha betre effekt enn sovemedisinar, og denne forma for behandling kjem dessutan utan biverknadar. Dette er bakgrunnen for utarbeidinga av søvnkurset «Sov godt».

Kurset vil bli halde på Husnes og det går over fire samlingar. For best effekt rådar Frisklivssentralen til å delta på alle samlingane.

– Dersom det blir stor etterspurnad er dette eit kurs som vi vil halda iallfall ein gong i halvåret. Som på fleire av dei andre kursa er det mogleg å melda seg på til kursa våre kontinuerleg, og så lenge det er nok deltakarar kan vi starte opp kurs, fortel frisklivsskoordinatoren.

God effekt

Varanes meiner at dei ulike kursa har effekt, og melder mellom anna om veldig god stemning blant dei ho har med seg på treningsgruppene.

¬– Treningsgruppene er for heilt vanlege folk og treninga har effekt både for dei som vil førebyggja helseplager, har helseplager og for dei som vil koma i betre form, melder ho.

Det er fleire som nyttar seg av tilboda som Frisklivssentralen tilbyr, og Varanes er svært glad for å tilby kurs og aktivitetar som har førebyggjande effekt.

Andre kurs på haustplanen til Kvinnherad Frisklivssentral rettar seg mot gruppebasert frisklivsstrening, kosthaldskurset Bra mat, diabetes type 2, KOLS, kurs i belastningsmeistring, samt recovery-kurs for personar med utfordringar innan psykisk helse og rus. Førebyggjande heimebesøk for eldre over 77 år er også inkludert i arbeidet som frisklivssentralen gjer. Fleire av desse er basert på eit tverrfagleg samarbeid med relevante aktørar innan helse.

På heimesida til kommunen kan ein finna informasjon om dei ulike kursa, og Varanes oppmodar interesserte til å ta kontakt med frisklivssentralen.