Sorggrupper for støtte og fellesskap

Målet med sorggruppene er å gje støtte og fellesskap til dei som har mista nokon. Her kan pårørande treffa andre som er i sorg, prata om det ein har opplevd og den ein har mista.

Ei av gruppene er for enker, enkemenn eller andre som har mista ein livspartner. Denne gruppa får samlingar på dagtid, i Valen kyrkje eller på Rosendalstunet. Aslaug Hellesøy styrer samlingane saman med Ingunn Koløy. Hellesøy har nesten 40 års erfaring innanfor ulike områder i sjukepleiarfaget. Denne gruppa er eit nyoppstarta tilbod i haust.

Livsmot og håp

Den andre gruppa er for vaksne pårørande etter sjølvmord og ulukker. Her er det sokneprest Kjersti Brakestad Boge som leiar samlingane saman med Koløy. Boge har over 25 års erfaring med å møta menneske i sorg, står det å lesa i pressemeldinga. Denne gruppa skal treffast i Valen kyrkje ein kveld i månaden.

I ei sorggruppe kan ein utveksla erfaringar, råd og informasjon om korleis ein kan handtera situasjonen, og ventilera reaksjonar og utfordringar saman med andre som forstår ein. Sorggruppa kan gje livsmot og håp ved at ein ser og høyrer at det er mogeleg å koma vidare i livet etter å ha mista nokon av sine kjære.