– Søralløpet er mitt hjartebarn
Pensjonist Leif Dankert Thuland, initiativtakaren bak det tradisjonsrike Søralløpet, var blant dei 100 deltakarane som trassa vêret og gjekk den 5,8 lange løypa søndag føremiddagen.
Publisert
Sist oppdatert
Søndag føremiddag skulle eigentleg to kjærkome tradisjonar gå av stabelen, men grunna vêrmeldingane denne dagen vart hjortatrakket diverre avlyst. Men til stor gleda for mange vart det 5,8 kilometer lange Søralløpet gjennomført, men også i år utan løpsklasse.
Langs løypa trefte Grenda på to smilande damer, Nanny Louise Eikemo (65) med hunden Rico, og Kjersti Sviggum (68). Dei begge var einige om at å koma seg ut i frisk luft er godt for både kropp og sjel.
Annonse
– Det er berre å kle seg godt, og koma seg ut. Dette trur eg må vera mitt femtande år eg går Søralløpet, så uansett vêr sit eg ikkje heime. Før i tida, då eg var yngre, gjekk eg så fort eg kunne, men no tar eg det som ein koseleg rusletur, seier Nanny medan venninna legg til.
– Vêret stoppar oss ikkje. Ofte ser det verre ut når du sit inne, men når du kjem deg ut er det ikkje så gale likevel, smiler Kjersti.
Ein engasjert initiativtakar
Trass i at årets deltakarliste ikkje gjekk over fleire sider, er Are Ulseth og resten av gjengen i bedriftsidrettslaget til Søral nøgde med årets løp.
Annonse
– I år passerte med litt over hundre deltakarar, noko som er litt lite, spesielt med tanke på at me har på eit godt år vore over fire hundre deltakarar. Men slik vêret er i dag trur eg me skal vera nøgd med årets deltaking, fortel han.
Blant deltakarane som hadde tatt turen rundt aluminiumsverket var den spreke pensjonisten Leif Dankert Thuland, sjølvaste initiativtakaren bak det kjærkome Søralløpet. Han tok bladfyken med tilbake til den gongen det heile starta.
– Det heile byrja då Kvinnheradløpet kom til. Då fekk eg veldig lyst til å få til noko liknande her på Husnes. Eg tok først kontakt med Trio for å høyra om dei ville gå saman om eit trimløp, men det ville dei ikkje. Deretter føreslo eg det for bedriftsidrettslaget til Søral, under eit årsmøte. Og det kunne dei gjera, men berre om eg kunne bli formann. Det takka eg ja til på staden, og var formann i 16 år, fortel den spreke pensjonisten engasjert og held fram.
– Søralløpet er mitt hjartebarn. Det er fint å sjå alle som deltar, på tvers av bygder, store som små. Løpet er eit fint samlingspunkt der ein får koma ilag og gjera noko kjekt saman. Og sjølvsagt konkurrere litt. Det er løye med det, kvart år seier nokon at no skal eg trena slik at eg gjere det enno betre neste år, men dei blir som regel ikkje noko betre, seier han og bryt ut i latter.
