Sommar og kos på øyo

14., 15. og 17. juli vil det vonleg yra med liv i Sæbøvik sentrum. På området utanføre Halsnøy kulturhus vil det koma eit stort partytelt kor alle aktivitetane velforeininga skipar til vil halda hus. Programmet er lansert, og billettane til dei ulike arrangementa har forsvunne i rekordfart.

– Me har valt å halda oss til ei grense på 200 personar. Då er det få nok til at alle kan føla seg trygge, og mange nok til at det blir kjekt, fortel Liv, før Maria tek over ordet.

Variert program

– På onsdagen blir det quiz med Jan Petter Myhre. Me har sett eit tak på 20 lag, og er om lag fullteikna, smiler ho.

Det er nemleg til no 19 lag som er påmeld. I tillegg til quiz, lovar dei musikk utover kvelden. Torsdagen er det duka til kaifest for heile familien, med mat frå BraLunsj og «Scenen er din» på programmet.

– Til «Scenen er din» er det tjue barn og unge som er påmeldte til no, og rundt 150 av plassane i teltet er allereie booka. Dette arrangementet er gratis, men ein må reservere plass på førehand slik at me held oss under 200, fortel Maria vidare.

Denne dagen vil også BraLunsj ved Tommy Persson passa på at gjestene har tilgang på god og sommarleg grillmat, noko arrangørane ser fram til.

Laurdagen vert det først sommarkafé i teltet, før det er klart for rekekveld med musikk av Marius og Remi Sjo.

– Rekefesten var utseld berre nokre dagar etter at me la ut billettane, noko som vitnar om at mange er klare for at det skal skje noko igjen, forklarar Maria.

Dugnadsånda blomstrar

Heile velforeininga er fulle av takksemd for det lokale engasjementet rundt aktivitetane, og roser dessutan dugnadsånda i nærmiljøet. Dei samanfattar at heile festen handlar om dugnad, og er glade for kvar og ein som har meldt seg som frivillig.

– Strupebandet hjelper oss jo med kaféen på laurdagen, dei har alltid stilt opp med kaffi og kaker. Me ønskjer jo å skape litt liv her på Halsnøy i løpet av sommaren, og trass i at det framleis er litt logistikk som må på plass, har alt ved denne minifestivalen ordna seg kjempebra, smiler Liv.

Sjølv om dei var usikre på om dei skulle skipa i stand noko festival, vart dei overtydd om å slå til då dei tidlegare i vår gjennomførte ein svært populær og vellukka bil-basar. Denne viste at sambygdingane var sugne på å komma seg ut, og gjennomføringa gjorde dei trygge på at også ein minifestival kunne gjennomførast på ein smittevennleg måte. I tillegg til tiltaka ein no er godt van med i landet, som avstand, faste plassar og handsprit, er det eitt tiltak som er særskilt autentisk og lokalt forankra.

Nostalgisk kuvert

– Me fann desse sildebretta lagra på loftet her i nokre striesekker, og no har me skurd og vaska dei slik at dei er klare for rekefesten. 200 slike har lege her etter den gamle fabrikken, og no kjem dei til nytte igjen. På denne måten vil alle gjestene få kvar sin kuvert med reker servert på desse gamle og nostalgiske bretta, forklarer Liv med stort engasjement.

Sildebretta vart i si tid nytta til å legga sild og brisling på, på fabrikk nr. 13 i Sæbøvik.

Chr. Bjelland & Co, som vart stifta av Christian Bjelland (1858-1927) i 1882, var eit av dei største industrikonserna i landet, med hovudvekt på hermetiske sardinprodukt. På midten av 1920-talet hadde konsernet om lag 2500 tilsette og rundt 20 fabrikkar langs kysten mellom Stavanger og Bergen. Ein av fabrikkane vart etablert på Halsnøy, og det er denne bygningen som i dag husar Halsnøy kulturhus.

Dei firekanta bretta er truleg knytt til ei ny type falsemaskin som konsernet gjekk til innkjøp av i år 1900, og ein kan såleis anta at årets rekekuvertar vil ha eit svært så historisk sus over seg.