Sølv til Kvinnherad bogeskyttarklubb
Denne helga vert NM i 3D bogeskyting arrangert i Tveitedalen på Utåker. Etter ein lang og våt dag i marka med pil og boge, var det klart for lagkonkurranse. I denne skaut Kvinnherad seg til sølv!
Publisert
Sist oppdatert
Dei tre som skulle representera Kvinnherad i lagkonkurransen var Terje Bakke, Atle Helland og Frank Johnsen. I kvartfinalen møtte dei eit lag frå Bergen Bueskyttere. Poengsummen vart 100 mot 67 i arrangørklubbens favør.
I semifinalen kjempa Kvinnherad-laget mot eit anna lag frå Bergen Bueskyttere, medan Klepp Bueskyttere møtte Laugen Bueskytterklubb. Det var her Laugen og Kvinnherad som skaut best, og desse laga møttes såleis til finalen. I denne stilte Laugen med hakket kvassare piler, og vann fortent med 115 over 109 poeng. Klepp Bueskyttere tok bronse i lagkonkurransen.
Annonse
3D og feltskyting er ei form for bogeskyting som ligg nærast tradisjonell jakt, og blinkane som var plassert rundt i skogen i Tveitedalen bestod av tredimensjonale figurar i ulike storleikar. Bogeskyttarane stiller med ulikt utstyr, og deltek såleis i ulike klassar. Alder og ferdigheitar speler også inn i kva klasse ein stiller i.
Denne helga er det 73 deltakarar; tolv kvinner og 61 herrar. Fire av menna er juniorskyttarar.
