Solid bogeskyting av kvinnheringane

I tillegg til stemne, var det også landslagssamling for bogeskyttarane, der Atle Helland og Terje Bakke begge er med. Laurdag og søndag var det nye stemne i Ulvik, der bogeskyttarane frå Kvinnherad også stilte med finpussa sikte.

Kombinasjonen med landslagssamling i Kvinnherad og to nye nasjonale stemne i Hardanger gjorde sitt til at dei beste skyttarane i landet var samla på vestlandet denne helga.

Landslagssamling

– Dette er i hovudsak stemnedagar, så landslagssamlinga blir gjennomført ved at landslagstrenaren er her og gir tilbakemeldingar, og har samtalar med oss, både ein og ein og samla, forklarte Atle Helland og Terje Bakke til Grenda før stemnet tok til fredag.

Fredag var det resultatlista etter fullført rund som talde, medan dei på torsdagen køyrte med finalar etterpå.

– Eg fekk litt tull med utstyret, men då eg fekk orden på det, så tok det seg opp, sa Bakke om torsdagsprestasjonen.

For han betydde det at han tok seg vidare til gullfinalen.

– Der var eg litt ruskete, så eg tapte gullet, sa Bakke.

Atle Helland derimot vann sin finale.

Sigra i tre av fire

Og at kvinnheringane har peiling på bogeskyting viser resultatlista etter dei fire stemna som vart arrangert frå torsdag til søndag. Både Terje Bakke i klasse Instinktiv (utan sikte) og Atle Helland i compound-klassen (med sikte) vant tre av fire stemne, og kneip med kvar sin andreplass.

Kjersti Ytrehus fekk to førsteplassar i klasse Instinktiv 2 , det same gjorde Hendrik Rytberg som skaut i bogejegerklassen.

– Landslagstrenar Mats Inge Smørdal var svært fornøgd med samlinga og det var berre lovord om opphaldet i Kvinnherad, og kunne lova at dette ikkje vart siste gongen det var samling her, melder Atle Helland etter at helga var vel gjennomført