Solfylt minicup i Rosendal
Laurdag var det duka for minicup i Rosendal, og fotballane regelrett strålte om kapp i det fine vêret.
Både store og små vart bada i sol denne laurdagen då den årlege minicupen gjekk av stabelen. Heiande klapping, engasjerte tilrop og smilande blide ungar med isbart kunne både sjåast og høyrast i fleng.
Stor overgang
Annonse
På sidelinja til ein kamp mellom Trio Blå og Rosendal J15 sat lagveninna Emilie saman med mamma Veronika og naut ein liten pust i bakken før det var Emilie sin tur på banen etterpå.
– Det har gått bra så langt. Det er kjekt å vera på cup, sa mamma Veronika smilande, medan Emilie nikka samtykkjande.
På nabobana spelte Trio Valen og Rosendal. Trenar Kjetil Helvik var strålande nøgd spelarane sine.
– Me har tre lag med her i dag, og det har gått veldig bra. Me har fått med oss nokre spelarar frå Uskedalen som har vore med oss dei siste vekene. Det har vore veldig kjekt, fortalde Helvik.
Annonse
– Me har øvd ein del på femmarball, for då er me fleire spelarar på banen og det er nok kanskje ein av dei største overgangane. Det er litt nytt og setja seg inn i, fortsette han.
Slitne
Heilt på hi sida av den store kunstgrasbana heldt dei aller yngste til. Dei spela trearfotball og hadde såkalla vantar rundt bana for å hindra at både ballen og spelarane fòr for langt.
Dagens siste kamp for Uskedalen mix og Trio Panda J hadde akkurat starta med ein god gjeng slitne uskedelingar.
– Dei er slitne no, dette er siste kamp, og i tillegg er dei jo meir aktive mellom kampane enn når dei spelar. Men dei smiler og har det gøy, og det er trass alt det viktigaste, understreka Magnar Skår, ein heiande bestefar til ein av spelarane.
