Sol, spenning og action på sommarleir

Det var femte året på rad for sommarleiren i Uskedalen, som bydde på tre dagar spekka med aktivitetar. Hovudaktivitetane var klatring og kajakkpadling, men det vart også både tid og høve til andre ting.

Sommarleiren hadde base på skuleplassen med oppslegne lavvoar, langbord og grillplass, og det var her bladfyken fann dei då underteikna tok turen innom tidleg om morgonen siste dagen for ein prat før aktivitetane tok til.

Tyske songar

Dei fleste var akkurat ferdige med frukosten og sat rundt bordet og slappa av med ulike grader av morgontrøytte. Felles for dei alle var at dei gleda seg til nok ein dag med spanande aktivitetar.

Nokre av dei som sat rundt bordet var Alexandra, Emilie, Isa og Gunhild, som alle kunne fortelja at dei vart freista til å melda seg på av familie og vener som hadde høyrt om leiren frå før.

– Eg fekk høyra det av mamma, og det er jo ei fin mogelegheit til å koma seg ut, treffa nye folk og prøva nye ting. Noko av det kjekkaste me har gjort så langt har vore kajakkpadlinga, spesielt då me skulle øva på kompisredning, men det var også gøy å rafta i elva, fortalde Alexandra.

I løpet av dagane på leir har deltakarane fått høve til å ta både brattkort, våttkort og topptau, noko fleire av dei nytta sjansen til å gjera.

– Eg har teke to, og skal prøva å ta brattkort i dag. Eg har vore med her to år tidlegare også, og synest det er veldig gøy. Det er mykje å finna på, og det er kjekt å treffa både nye og gamle kjente, fortalde Gunhild.

På spørsmål om kva dei gjer mellom aktivitetane og på kveldane, manglar det verken på feriemodus eller oppfinnsemd.

– Me ligg eigentleg berre og slappar av, innimellom spelar me litt fotball. På kvelden ligg me berre i teltet og venter på at dei andre skal sovna, sa Ola lattermild.

– Ja, men du likar å liggja og høyra på tyske songar også då, småflira Emil.

Iver legg til at dei også har hatt ein songkonkurranse i god Beat for Beat-stil.

– Det var om å gjera å kunna songen, springa fram og få flest poeng. Ola og eg sprang fram mest, det var vel eg og han som kunne flest songar, forklarte han.

Litt av poenget

Sommarleiren har etter kvart blitt eit kjend innslag i den vesle bygda, og blir kvart år arrangert gjennom Friluftsrådet Vest. I år er derimot fyrste året at leiren ikkje er fullteikna. Det tek leirsjef og primus motor Sverre Myklebust på eiga kappe.

– I fjor var me 24 deltakarar, i år er me 19 pluss 8 vaksne. Me har nok vore litt dårlege på å reklamera nok i forkant med annonsar og slike ting, forklarte han.

På spørsmål om sommarleiren kanskje også krasjar med andre ting som føregjekk denne veka, er han klar på at det er litt av poenget.

– Det skal vera samtidig med fotballskulen, på den måten får dei dei mest ivrige fotballspelarane der og me får dei mest ivrige deltakarane her. I tillegg er det kanskje nokre som då også må velja, og det tenkjer eg er viktig lærdom det også, poengterer Myklebust.

– Me kjem uansett til å fortsetja å driva campen så lenge me får midlar til det frå Friluftsrådet Vest. Det er ikkje pengane me får inn her som dekkjer alt saman, dei rekk kanskje til leige av kjøken og hallen.

Når eg avslutningsvis spør den eventyrlystne gjengen om kva som har vore det aller kjekkaste i løpet av dei siste dagane, er dei fleste heilt einige:

– Elveraftinga! er det eintydige svaret.

For dei som måtte lura, dersom ein vil rafta i Uskedalen tek ein altså med seg ei stor luftmadrass oppover Uskedalselva, før ein hoppar uti og så raftar nedover. Det er rett nok ei relativt roleg elv med få stryk, og såg beint fram ganske artig ut.