Søkkehòl trugar vegen

Eit stort søkkehòl under fylkesvegen gjer at det no vert bygd ein omkøyringsveg på ei strekning i Herøysundet.

Dei siste vekene har det stått nokre markørar langt inn i fylkesvegen gjennom Herøysundet, like ved den sørlege avkøyringa til Bringedalsbygda. Grenda har fått fleire rapportar om nesten-ulukker på staden, då det er dårleg sikt der grunna den tette vegetasjonen på nedsida. Ifølgje Tina Nesse Mannsåker, fungerande byggjeleiar i Statens vegvesen, har det oppstått eit søkkehòl under vegen, som berre har blitt større og større.

– Grunnen til at Sebra-markørane har stått der så lenge, er at vi har vore i dialog med kommunen for å finna ut kva som kunne vera årsaka til søkkehòlet. Vi trudde kanskje det kom vatn frå den kommunale vegen ovanfor, men per no er status at vi ikkje veit kva det skuldast, fortel ho.

Uheldig

Denne veka kom det anleggsmaskiner til staden.

– I fyrste omgang skal vi grava ned i vegen for å sjå om vi kan finna årsaka. I tillegg skal vi tetta igjen hòlet og setja ned ein kumme og ei stikkrenne, opplyser Mannsåker.

Ho legg til at det ikkje er meir enn to-tre år sidan det oppstod eit liknande hòl same stad. Den gong vart hòlet fylt igjen og kummen reparert.

– At det har skjedd igjen etter så kort tid er sjølvsagt uheldig. Vi håpar verkeleg vi finn ut av det no, for vi legg mykje midlar i dette, seier Tina Nesse Mannsåker.

I arbeidsperioden vil vegen bli stengd. I går var entreprenøren godt i gang med å laga ein mellombels omkøyringsveg på oppsida. Omkøyringsvegen vil truleg få plass til to bilar i breidda.