Søkjer om utslepp i Klosterfjorden

På Statsforvaltaren i Vestland si heimeside vert det opplyst at Equinor Energy AS har søkt om løyve etter forureiningslova for utslepp av ulike kjemikaliar og ureinsa avløpsvatn i Klosterfjorden. Dette skal føregå når Johan Castberg-skipet skal testast ut, og det dreiar seg om ein periode på 10 veker i den såkalla «inshore-fasen». Oppstart vert truleg i april.

«Johan Castberg» er ein flytande produksjons- og lagerbåt. Fartøyet er 300 meter langt og 55 meter breitt. Avstanden frå hovuddekket til kjølen er cirka 30 meter. Etter opphaldet utanfor Halsnøy og Fjelberg, skal «Johan Castberg» slepast nordover til oljefeltet i Barentshavet med same namn.

Raskt brytast ned

Den omsøkte plasseringa i Klosterfjorden ligg utelukkande i Kvinnherad, om lag 1 kilometer frå grensene til kommunane Sveio, Stord og Vindafjord. Djupna er om lag 370 meter på staden.

Utsleppa det er søkt om består av: SRU-kjemikaliar frå reingjering av reinseanlegget sitt filter, hypokloritt (klor) frå desinfisering av sjøvatn, brannskum frå test av brannsløkkingssystem, avløpsvatn frå toalett, dusj, kjøken og vaskerom, og slipestøv frå fjerning av fortøyingsbrakettar frå skroget ved hjelp av skjerebrenning og sliping.

«Equinor skriv at dei ikkje forventar merkbare miljøkonsekvensar av dei planlagde utsleppa under inshore-fasen. Utslepp av kjemikaliar til sjø vil hovudsakleg skje med kjemikaliar som raskt brytast ned i naturen og difor ikkje vil bidra til generell forureining, eller ha konsekvensar for lokale populasjonar», vert det opplyst.