Søkjer om utlegging av flytebryggje med ladestasjon

Eide Fjordbruk ynskjer å leggja ut ei flytebryggje ved Skålakaien i Rosendal. Bryggja skal nyttast som fortøyingsplass og ladestasjon for to heilelektriske båtar som skal frakta besøkande ut til Salmon Eye.

Det er ABO plan & arkitektur på Stord som har sendt søknaden til Kvinnherad kommune. Ladestasjonen og flytebryggja er planlagd etablert med landgang frå kommunal eigedom, like ved «thaimat-vogna» i Rosendal sentrum. Det er inngått intensjonsavtale med Kvinnherad kommune, som stiller deler av hovudkaien til disposisjon for anløp av visningsfartøya knytt til The Salmon Eye.

Den nye attraksjonen skal plasserast ved oppdrettsanlegget Hågardsneset, vest for Snilstveitøy. Frå publikumsmottaket i Rosendal sentrum, vil besøkjande bli frakta ut i heilelektriske båtar. Under den 8-10 minuttar lange overfarten, vert passasjerane introduserte for utvalde tema, som vil bli utdjupa under besøket på Salmon Eye.

«Båtane og anlegget skal vera tilrettelagt for alle besøksgrupper, inkludert rørslehemma. Ein standard visningstur vil vara om lag 1,5 time», vert det opplyst i søknaden.

Flyttbart

Ifølgje ABO vert dei to heilelektriske båtane 11,5 meter lange og 3,5 meter breie. Flytebryggene er 20 meter lange og 4 meter breie.

«Detaljane kring eventuelle utriggarar er ikkje fastlagde, men det er rom for to utriggarar på kvar side av den inste flytebrygga. For å skjerma båtane for vind og bølgjer, er det naudsynt med ei T-form. I tillegg til lading for Eide Fjordbruk sine båtar tilknytt visningssenteret, skal òg ålmenta kunne nytta seg av det nye ladeanlegget», skriv ABO.

Det er elles planlagd ein flyttbar ladestasjon på land, med storleik 2x2 meter og høgde 2,5 meter, samt to ladestasjonar på flytebrygga på 1x1 meter.

Vanskeleg parkering

Visningsanlegget skal i utgangspunktet ha 10 parkeringsplassar, med ABO opplyser at det har vist seg vanskeleg å finna høvelege plassar.

«Det er press på parkeringskapasiteten i Rosendal sentrum i høgsesong, og dette er eit av temaa som områdereguleringsplanen for Rosendal tettstad tek sikte på å løysa. Fram til områdereguleringsplanen er vedteken, og ei meir permanent løysing er valt, søkjer ein difor om ei parkeringsløysing der besøkjande nyttar seg av parkeringsareal i sentrum. Besøkjande til visningsanlegg kjem ofte i grupper med buss, eller er i Rosendal på grunn av andre attraksjonar», analyserer ABO.